Numei ana umlou hileh....

Pasal konkhat alunghan tieng’u leh numei phiengsan..... adu ada.... ati jiuvin ahi. Chule numei musit mama jieng pasal tamtah leisiet chung’a hin ahing nalaiye. Hibangse’a pasalho’n anuoise numei hohi ipiding’a mi nuoise ding gunsed’a hung pieng’uh ahidem? Pathien in Adam achang’a aum chu phamo asa’n, hizeh chun akithuopi ding in numei Eve kitinu chu amapa nahgu akuon in ahin siemdoh’e. Chuti ahileh numei hohi pasal kithuopi ding’a siem’a um ahiuve iti nuom suoh nadiuvem? Pasal in atoh nuomlou zouse tong ding’a siem ahijo diuvem? Ahilou leh pasal kithuopi ding’a siem ahizeh uva pasalho toh nuomlou zouse atoh’u ahi ngapsah dem? Tuni’a i-seidoh nuom pen’u chu numei natoh ding le tohlou ding lampang ahipuon, leisiet’a hi numei ana umlou hileh..... ti lampang i-seidoh nuom’u ahijoi.
Pathien in Adam asiemdoh’a chun ana lunglhai sel jieng henlang, numei ana siembe da mong mong taleh tuni’a vannuoi leisiet iti’u hi achuombeh hitei inte. Pasal chapang a awsuo hung kikhel kiguo pan pan akuon’a tehse ho changeiyin mobile phone a nungah lim akoi zouse’u zong khu ana umlou ding himai’a. Ipilim mong mong aumde’o? Ben Affleck, Tom Cruise ahilou leh Salman Khan limho chula koi zouse’n avetnuom zing vang hidiehlou hiya na? Gancha lim vet vet zong chula khop aum ding da’n. Nungah lim melhoi tahtah, achuom chuom vetchim theilou vet toh vang kikhe thou ding hichu’o.
Among mong in leisiet chung’a hi numei ana umlou hikit taleh, mihiem hohi iti hung pien ding ahi tadiuvem? Pasal khat apienbe ding sieh leh Pathien in leingaan akho kho jieng ding vang chu iti kigel leh nati’em? Numei umlou ahitah zeh’a chu pasal ahung pienglha hochu pasal sung’a hung pieng ding hikit taleh, pasal itobang hochun nao anei uva, itobang hochun nao avopdi’u ahidem? Pasal thahad, world wrestling entertainment a pangzou ho ahilou leh a thahad mongmong ho’n nao avoplou di’u, pasal ahivang’a a numei pien zepho’n nao avop ding hileh ipi atide’o??
School le College kai zong nopmo chuom maithei vehta! Chemistry practical phad leh test tube kiholmo sah’a pasal dang ho komkom’a gadin ding chula koima thanuom behseh puontin, biology practical jucha nou kicha’a i-nung’a hung kisel ding zong umlou maithei nalai.... Ahilou leh History class a Akbar chu koi hita ti’a i-lawipa gadoh ding zong chu hahsa thim vehta. Pate’n top-up manding eihin pieh’u top-up sang’a canteen a nungah chana nehpi ding zong um talou ding, sum vang chu lieu lou maithei, hizong leh top-up bawl’a sodtah tah kihoupi ding leh lekha simmo jen’a sms kithotpi ding zong umlou ding hichu’o na? Home-work byheart louzeh’a kijeb ding hile teacher zouse pasal ngen hiding, ol’a eihin jeb dingla umlou ding, athuoh’a pan pan jieng ding himai. Gift juoh ho’n zong khongmo thou uvintei. Annual sports a hapan’a i-pan vang’a refreshment pasal ngen in ahung homding chu ngaituo kit nalai’o.
Bazar’a kivahdoh henlang hileh nihtong cheng’a kihot zetzet’a lamjod muding la um tapuon tin, garineo’a goggle kibeh’a huiyin a sam amud leng jinjen zong umlou ding, i-musun chun pasal jiengseh hikit ding ahiye. Nungah ve’a lampi pam’a ding ding jieng zong umlou maithei ahitai. Pontho tah’a nungahho muna ding’a natong zouse’n la tong tapuontin, a ning kitel umdi dan na? Ning kitel aum’e Maxxy Minthang ahilou leh Kakai Kipgen lasah kingai hen’o ti’a laa i-ngai lungdeipa kom’a laituol lengdi’n ahilou leh jaanlai lengpa neihung lhem’o kiti kit ding, na kilawm’e tangpa, na saipikhub toh tiho vel. Ahijeh’a hiche hochu umlou ding ahiye. Khop aum ding dan chu album vetding zong umkit lou ding ahiye. John Lalboi le Sharon Minthang a laam khom lhon ding tichula hithei puontin, Deilaichaan, Lungsung Lengnu, Senorita, Suolam Nungahnu.... adang dang hozong umloudi’u ahiye. Hiche tieng chule LDMA zong umlou ding hikit nalai. Magazine ho i-sim leh tukum Chavang Kut’a handsome contest meilhei ho’n alah zeh in lunglhai aumpoi kiti ding ahiye. Chuti le vang, kin khohtah neiho tilou ngal koima zouse garineo in zong moh lhai lhai ngapcha hihvehta.
Leisiet chung’a hin numei ana umhih mong mong leh pasal ho gentheina asan ding dan chu ahung piengdoh zouse kisih pai pai jiengdi’u ahiye. Azehchu naosen in chebding nawitui amulou ding, agenthei nikhuo’a aki ngapna ding anu pheichung amulou ding ahiye. Ahung guollhan toh kilhon’a alungmuonna ding nungah amukit louding ahiye. Upa ahinung’a alhamuonna ding aji umkit lou ding ahi. Chule tehse ahitieng leh akhut kituhpi ding umkit talou ding ahiye. Hizeh’a chu numei hohi Pathien in pasal ho thilthon ahin pieh tobang’a i-nei’uh ahiye. Hizeh’a chu akiman man in numei nuoise tah’a bawllou ding Pathien lungdei ahiding tahsan aum’e. Belkehbai tobang numei lungsiet thiem ding chu pasal ho mopuohna ahiye.
Alangkhat’ah numeiyin leisiet chung’a numei umlou hileh pasal ho genthei ding dan ti’a ki thang-at tah’a a pasal anuoise’a ahileh a masang’a hung lhung ding thilchu seilou’a zong hedsa ahikit’e. Numei in pasal aluchang ajabawl bang’a ajabawl ding angaikhoh kit in ahi. Azehchu leisiet chung’a pasal umlou hileh numei hohi kiseise tuo tuo jieng uvin tin, toh le tham donman lou hiel avel in kiseise kit uvin tin, hiche zong tieng chule khatvei toh kiseise tuo kit uvinte. Alangkhat’ah numei le pasal umlou hileh leisiet chung nopmo ding dan chu koima zong pieng ngapcha puonte. Anigel gel’a aumlou leh thil khohtah khat hung lhung jieng ahizeh’a kilungkhat tah’a nna atoh khom lhon ding angaiye. Hizeh’a chu numei le pasal hung kilungsiet lhon’a hung kicheng kit lhon nalai ahiye. Hiche hi Pathien thupieh zong hi’ah ahiye. Hiche thupieh zuilou’a numei le pasal lungsietna neitheilou hochu mi vangse chungnung ahi tauve.