Guhthim um talou ding - LD October 2010

Mobile phone ahung umdoh akuon in innsung tamtah’ah lungjinna meipi ajingta’n ahi. Amanchahna ding khel lampeh’a i-manchah tah zeh uvin sietna’n aluota’n ahi. Chate’n a mobile uva itobang lim akikoi’u ham ti zong heddoh thei ahi tapoi. Chule mipa chu koitoh chutih chan kihou hija, minu chun koi tabepseu sms athot thot jieng ahi tadem? Gaha khuol ding chula, mi gingmo toh aki kilou kit in, ginmo lou ding chula ginmo aumkit in, ginmo ding chula ki gingmo khiel kha kit leh innsung’a thimpi chengden kit tading, ipi itidi’u hitam? Gamdang bouseh in hiche thu hi aboipi ahipuon, eiho lah jieng’a zong hiche thubuoi in aluonkhum mi tamtah aumtai. Hiche tobang ho’a ding chun lungdon angai tapoi. Spy Cell Arsenal kiti software khat siemdoh in aumta’n, hiche hin mi tamtah’a ding in kaa thanopna ding hizongleh innsung kituona ahin siemdoh ding ginchad aum’e.
    Spy Cell Arsenal hi internet akuon’a download thei ahi’n, hiche chu ipi mobile hizong leh install bawl jieng thei ding’a asiem’uh ahiye. Hiche software chu na phone a install na bawl leh koi koi phone guhthim’a nachin nuom ahi ama’n nahin dong tante. Hiche dungjuiya chu nang in na dongmanu/pa ahilou le najinu/pa chule na chate phone jieng zong amaho hedlou’a asung nakhuol thei ding ahiye. Chule koitoh kihou’u ham tizong heddoh thei intin, itobang sms kithot’u ham tizong naheddoh theiya chule sms jieng zong nasim thei nahlai sed ding ahiye. Leisiet vang akidang cheh cheh jieng’e ong?
    Spy Cell Arsenal na manchah vang’a na balance kiemlou ding ahiye. Chule nang in mi phone guhthim’a na vetlhah ahilam a phone neinu/pa’n zong aheddoh lou hiel ding ahiye. Chule amahi’n memory lhomcha bouseh alahding ahi’n, aboina imacha aumpoi. Ginmo nanei leh na patep theiye.