Kuki Nampi Kithokitna

Achiesa October nisim 19-20 sung chun NEDSF, Kharghuli, Guwahati, Assam ah Kuki Nampi Kithokitna ti thupi’a mangcha’n workshop ana um in ahi. Tuchung’a Guwahati mun’a um hi anivei channa ahita’n ahi. Amasapen chu Nagpur mun’ah ana um in, athumvei channa hi Imphal mun’a umding ahiye. Hiche workshop hi namsung’a nam khantou ding deisahna jal’a mitomngai phabep in amaho sum apuohdoh uva tohguon asiem’uh ahiye. Amaho panlahna jal’a nampi’n khantouna le machalna ban’a kilungtuona le kengkhat’a dinkhom theina ding dinmun i-lhundi’u ikineppi uve.


(A) Kuki Innpi Manipur koma piehlud ding’a hung kiphatsah ho:
1. Haosa’a kivaipuohdan: Guwahati workshop in Kukite kivaipuohna danho chung’a KIM in ahoileh akitupbe cheh nading’a ahin chepiu hi pachatna akipen, hiche toh kilhon in KIM in eihetpeh diuvin phondohna akineije.
2. KHOSUNG KIVAIPOH SEMTOH DING: khosung kivaipoh hohi adihlouna tampi tukhangin ahung sohdoh tan ahi. Hijeh hin Delegates jousen lungkhat in ngehna kinei kit chu ahileh, KIM in Manipur sunga haosa ho dinga Seminar District-wise a abolpeh diuvin ngehna toh kilhon in kithopi nathei aumleh pan ladin kigotna akineijin ahi.
3. KUKI INPI KIVAIHOMNA SEMPHATDING: Kuki Inpi kivai homdan semphatding thuhi, 10-15 January, 2011 sung’a KIM makaina noija 3rd workshop Imphal a kigong hen tin phatsah na akineije. KIM vetsuina noijin tohgon ho hin kingaito hen tinjong phatsahna akinei kittai. Hiche workshop sponsor hinbol dingin Pu D.P. Haokip, Commisioner, Income Tax, Govt. of India le Pu K. Lhouvum, IDES, akipedoh hontai.
(B) Workshop hin machalpi nadinga kinop tona:
Workshop hinbol jom jing dingin Delegate ho jousen lungkhat le thakhat in gellhahna akineitai. Ajeh penchu Kuki society sunga gelkhom ding le seitoh ding tampi akimu doh in ahi. Hijeh chun Kuki chate muntina umjouse henga Kuki Nampi kithokitna lampi ho hetthem sah lou akhoh dan akigel lhutan ahi. Hiche workshop hin-mapui peh jing dingin Delegates ho jousen ijakai hin sutup jing ding le hin gong jing dingin Pu K. Lhouvumm, IDES le Pu Mangneo Lhungdim, Regional Manager, IGSSS teni hi December, 2011 chan din lhendoh ahi lhontai. Amani hin kituple machal tah a ahin tohdoh jou lhon nadin Pathen henga taopehna Pu Rev. Dr. M. Kipgen in aneipeh tai.
Pu D.P. Haokip, Comissioner, Income Tax, GoI in Workshop kibolna chunga akipana le Nam ngailutna aneina ho aphongdoh in ahi. Tahsa le lhagaova chekhom ding akhoh dan ho jong hilchetna aneijin ahi. (read KSO/KWS) Tununga workshop kibolding naho a jong panna le tohkhomna eineipeh diuvin jong ngailutna jalin eidinkhom pi jingui tiho aki mudoh in ahi.
Achainan, hiche 2nd workshop hi homtho tah leh kingailu tah in toukhomna hihen, lunggel seikhomna hijongleh akinei toh lhon in nikho 20th October, jan Pung 11 in kikhenna ana kinei tai.
Pu Satkai Changsan, Lecturer, President, KSO(Guwahati) le atohkhompi hon ni ni workshop kibolna chunga kithopina nasatah a ahin nei ju hi suhmil theijin akingaito poi. Achung uvin kipana lentah Convener hon kahin phongui.