5 Best Mobile

Mobile phone ahung umdoh akuon in company ho’n athah thah asiemdoh zing uvin ahi. Eiho’n mobile phone i-choi til lai uva ana suohho tulaiya akimulou tamtah aumtai. Asuoh masaho sang’a hoijo le phajo tamtah ahung suohdoh kitta’n ahi. Mitoh kihouna thei maimai tiho chu chie behseh lou hiding dan ahitai. Vadung khat’a tui aumnai ti’a moh choplud jieng thei ahitapuon, hoilaiya chu atuiluong had’a, hoilai mun chu kizapna ding’a mi’n aha deilhen ham ti vettuoh’a, hiche dungjuiya choplud phad ahita’n ahi.
Chule mobile phone choding’a kiguo nahi leh khat pou pou alimhoi man’a namoh choh jieng theilouna phad ahung lhung tai. Itobang hochu ahoi hija, itobang chu ahoilou ham ti zong hedchien set angaiye. Chohzou nung’a kadeihih’e ti’a chapang phin’a kiphin la hithei talou. Eiho lah’a zong mobile phone lam’a khantouna hi asanglheh jiengta’n ahi. Sangsom nuoilam hochu chapang in zong amoh vet tapoi. Hiti ahitah zeh chun vannuoiyin 5 best cell phones of 2010 ti’a ana lhendoh ho gah ve’u hite’o.

Iphone 4



iPhone ahung suodoh til chun mobile in abawlthei ding kalval’a natoh theina anei tobang in ana kisei hiel’e. Chule iPhone tedlha ding mobile phone adang suohdoh tapuonte ti’n zong ana kiseiye. Applications, touch screen, internet jangkhai tah’a browse theina hozeh in ana minchie lheh jieng in ahi. Hitiho zeh’a chu ama thakhel ding hung umdoh kit tapuonte anati’u ahiye. Hinla tuhin iPhone 4 ahung suohdoh kitta’n ahileh asuodoh masat laiya iPhone bawltheina hochu chapang kichepna toh akilou kittai. Tuhin design chuombeh in ahung poddoh kit in, video calling umzeh maimaiyin zong aluitoh akikhietna asang lheh jieng’e. Hizeh’a chu Best Mobile phone for 2010 ana mu ahiye.

Black Berry Torch 9800
BlackBerry hi mobile phone lah’a aminchie pen anahi’n, hinla iPhone ahung suodoh toh kilhon in hatah in ahung khesuhta’n ahi. Hiche toh kilhon chun hahsatna dinmun’a kithah tundohna ding’a ana kikhed khed’uh BlackBerry Torch ahin podoh kit tauvin ahi. Operating system thahset toh ahung lendoh phad chun speed hadtah’a internet browse thei ahung hita’n ahi. Chule touch screen zong ahi’n, keypad zong aneithou’e. Hiti hozeh’a iPhone 4 toh kited thei ding’a Best Mobile Phone for 2010 a mun aneizou ahiye

LG Optimus
LG Optimus hin smartphones dangho toh kibang application aneiyin ahi. Hiche chungchuon’a chun amahi touch screen ahi’n, adeilouho’a ding in QWERTY keypad zong aum’e. 5 Megapixel camera le HD recording ban’ah 1 GHz processor zong ahikit’e. Ahed bailam pen ding in kisei leh amahi Windows 7 OS mangcha ahizeh in computer toh kibang tithei ahitai.

HTC Incredible
Leisiet chung’a phone lah’a a speed hadpen’a kisei chu HTC Incredible ahikit’e. Amahin 8-Mega-pixel camera aneiyin, 8GB internal memory ahikit’e. Chule Wi-Fi, Bluetooth, GPS, 3G Network le smartphone dangho’a um application zouse aum suoh keiye.

Samsung Epic

A screen toh kimat’a camera hoitah um ahi’n, video calling adi’n ahoilheh jieng’e. Chule ama display hi HD toh thakhat ahitai. 1GHz processor nei, 4G network ading’a ahoipen, QWERTY keypad chule Wi-Fi zong um ahikit’e.  Mobile phone dangho application nei zouse’n ama’n zong aneiyin, mobile phone dangho masang’ah akizumsuona ding umlou hiel tobang ahijeh in 5 Best Mobile Phone of the year 2010 lah’a ama zong ahung kitahlang pha’e.
Laijon ho’a ding in achung’a phone kiseiho kichoi ding chu kithangat umthou vehta...


.






.