Eiho Chavang Kut anahi hija (First Word)

Ka Laijon, phad le nikhuo kitol zing toh kilhon in eiho’a ding in Chavang ahung lhung kittai. Tehse ho’n chavang lai leh mihoimo zong ahoidom’e anati uve. Hiche thucheng hin chavang lai nopda’n le mantamda’n eihin seipieh nuom’uh hitei ding in tahsan aum’e. Chenna thinglhang gamsung’ah chavang huilhi ahung nungji’n, mitin ding in kingailudna ahin puohlud pieh hileh kilawmtah in phad dang’a numei le pasal kicheng sang in zong chavang laiya kicheng’a mou’a kipui mi atamjo’n, hizeh chun kingailudna phad zong titheiyin aum’e. Khopi sung’a chavang le thinglhang gam’a chavang anopda’n kibang thei puonte. Ju le va hamgin ngeiho’n thinglhang gam khopi sung sang’a anopzoh da’n hatah in asulangjo’n ahi. I-chenna’u thinglhang gam, Pathien in eipieh’u, hibang’a mun nuom le gamhoi sung’a chavang ahung lhun kipapina’a Chavang Kut kiman zing nagam in Chavang Kut ahed phahlouna hi kum tamtah ahita’n, tukum’a zong Chavang Kut in eiho gam, thinglhang gam a choihoi kit diehlou ding in lamkaiho’n lung gellhahna ana nei tauve. Chavang Kut hi vang, khopi sung’a akiman sang in thinglhang gamsung’ah kimang leh thinglhang mite’a ding in iti thanop aum tadem? Thinglhang gam’a kimang leh thinglhang miho kipahval uvin tin, jukham sakham in mipi buoi inte ti’a lamkaiho’n agel’u zong himaithei inte. Khopi sung’a ju umlou le kinah kibou umlou zong vang hidiehlou hija!!
Phad masa lai chun Chavang Kut in thinglhang gam ana choihoi zing in, tuhin khopi sung’a cheng meilheiho kipana golnop dan in apoddohta’n ahi. Ipi sei zong leu hen Chavang Kut hi phaituol sung’a um meilhei ho kipana Kut suohdoh ahitai. Phad hung chie zing intin, thinglhang gamsung’a Chavang Kut ahung kiman nikhuo zong vang hung lhung tei inte. Hiche nikhuo tieng le chun, tu’a eiho thinglhang gam hi meilheite thinglhang gam ana himan tante. I-guolnop thupi pen’u akiman nikhuo tieng leh thinglhang mi agalha um zong leh, meilhei hotoh atamdan’uh akibang jita’n ahi. Israel chate Babylon gam’a suoh ana taan’u chun Pathien vahchoina laa asah nuom pouve. Migam’a keiho’n iti Pathien kavahchoi ding’u ham ana tiuve. Migam’a keiho’n iti Chavang Kut kamandi’u ham iti thei’uh angaiye. Hiche iti theilou zeh’u chun phad hung lhung ding ho’a hi kagam uva miho’n iti chavang kut ahung mandi’u ham ihintidi’u, ahivang’a la eiho gam ana hitalou ding. Lainat um behseh hilou ham? Itu i-chate’n tu’a Chavang Kut aman’u khu eiho Kut anahi hi’a.... ipu ipate uvin ana kijuohdoh’uh ahita’n, amanna’u zong khu eiho gam anahi ahiye ahintidi’u chu lainat aum valbehseh’e.