Gold Medal khat i-sangkit tauve

Achiesa October nisim 13, 2010 nikhuo’a The 12th Convocation of Manipur University ana kimanna’a chun laijon ST. Thienkhomang Haokip @ Thiengmang in Sapam Tomcha Singh Memorial Gold Medal ana kisan in ahi. 2009 kum’a M.A. exam abawlna’a International Relations mark sangpen amuzeh’a Political Science simlai ST Thienkhomang in Sapam Tomcha Singh Memorial Gold Medal ana kisan ahiye. Hichangeiya lolhinna ahin muna chung’ah innsung mite’n kipapina aneina ban uva LD in zong hachangpa’n akipapi’e. ST. Thienkhomang Haokip lolhinna hi Churachandpur daily news phabep hedsah in ana um in, hinla koima’n ana suodoh pieh tapoi. Prelim exam lolhing maimai hung kisuodoh hosang’a thupijo le simlai tamtah in kitilkhouna’a aneitei ding tahsanna jal in LD in khohsahna neitah in anuoi ahin ST Thienkhomang Haokip thusim chomcha’n ahung kitahlang nuom’e.
Sadar Hills gamsung’a um Tingkai Kholien kiti khosung’a cheng Ml. (L) Mangkam Haokip le Nl. Henlhing Haokip teni laigil gaa ding in 1978 kum chun Thienmang ana pieng’e. Thinglhang khuo’a hung piengdoh ahizeh le innsung hahsatna zeh in thiemzilna lam’ah chuti tah in ana masot zoupoi. Kum 9 alhin kum, 1987 kum in thiemzilna lam’ah ahung kipanbep in, Tingkaikholien Junior High School’ah Class A apat Class I changei anasim in ahi. 1990 kum akuon in Tuibuong’a um Grace Academy ah ahung kaipan in, Class VI changei ahin sim’e. Vangphat umtah in thiemzilna lam’a sum le pai lud seng talou ding in 1996 kum chun Jawaharlal Nehru Vidylaya, Tuinuom’ah alud’e. Hinla 1997 kum’a Lamka boina zeh in aban zomthei talou in thiemzilna lam’ah akicholduo ta’n ahi. Chule tahsa damtheilou mi ahizeh in 1998 kum’a zong chun aban simbe talou in akicholduo kit in, 1999 kum chun Grace Academy, Tuibuong’ah Class IX ahin simpan kittai. 2000 kum’a HSLC exam ana um’a chun ajao in, hiche’a chun II Division in ahung lolhing’e. 2001 kum in Sielmat Christian Higher Secondary School ah Class XI asim in, Class XII vang kumni asim in, 2004 kum chun II Division mama in ahin zoukit’e. 2004 apat 2007 changeiyin B.A. Bethany Christian College’ah asim in, hiche zong chu II Division mama’n achaikit’e. 2007 kum in Manipur University ah alud in, gunchuna le tomngaina chu Pathien in phatthei abuohta’n, M.A. vang chu 1st class in ahin zoutai.
Thienmang thiemzilna toh kisaiya hedthei dom achung’a hung kitahlang ho akuon’a mudoh thei chu mihiem’a ding in lolhinna kitihi moh’a mujieng thei ahilou dan akichien lheh jieng’e. Lekha simna lam’ah gentheina tamtah ana thuoh in, hizongleh lunglha lou hiel’a pan ahinlahna zeh in Gold Medal a ngongchang’ah aki’o ta’n ahi.

Chapang atamjo hi kumthum le kumli kikah’a lekhasim kipan jiengseh ahiye. Kum 9 a lekhasim hung kipan pachu class room high school akailaiya teacher phabep toh akum kibang ding ahitai. Chule class room sung’a mi zouse’n He’u ti’a eihinkou ding vang chu thilnuom hilou hiel ding ahiye. Hinla hiche ho zouse khel lampeh’a chu lolhinna ana um nalai ahiye. Mi tamtah khatvei losap zeh’a lekhasim thase’a haisan jieng ho’a ding in vang amaho chan dingsa lolhinna chu midang pieh in ana umtante. A lekhasimna sung’ah Thienmang zong khatvei sang’a tamjo ana losam in ahi. Chule ama sang’a hatah’a chapangjo jiengseh toh hung kivoptou’a lekha ahin simtou ahi’n, hiche zong hi mi tamtah’a ding in impossible hinte. Hinla Thienmang’a ding’a I’m possible anahi zeh in simlai tamtah vetton thei le kitilkhouna thei hinkhuo ahin suodoh jota’n ahi. Hiche article simdoh zouse’n lolhinna kiti hi one two three a hung lhung jieng lou ahida’n i-heddoh uva, khatvei nivei losapna chu lolhinna ding’a kalbi phapen’a i-manthei teidi’u iki deisah uve. Simlai lunglhaho’a ding’a lunglhah louna ahung hi’a, alung lhalou ho’a ding’a kitilkhouna ahiding deisahna lientah pum’a Thienmang thusim hung kitahlang hi i-phatchuompi di’u ikinepna’u ahi.