Alex Luonlhi

Alex Lalcha Kipgen

Laidang lengdi’n ti laa ahin sah akuon’a hung minthang doh Alex Lalcha Kipgen in achiesa October nisim 30 nichun Sapormeina, Sadar Hills’ah Luonlhi kiti audio album khat ana lhadoh kittai. Hiche audio CD hi ama’a ding’a anichanna ahita’n, amasa’a sang’a hung minchiejo ding in ginchad aum’e. Alex Lalcha Kipgen hi Kangchup, Sadar Hills a cheng ahi’n, tuhin a chapa lhathum ahung lhin ding ngahlel tah in hinkhuo amang’e. Chule September lha’a release Lhalam Chollha music video album a laa atamjo amasah ahi’n, Lungsiet Khat, Lhalam Chollha kitiho ana minchiepi lheh jieng’e. Alex Lalcha hi kisuonlelna’a dim, mi polnoptah ahi’n, chule ama lasah hin midang’a toh kibanglou, lungsiet umtah’a laa sahdoh theina talent aneiyin ahi. Mitin ngaichad thei ding’a laa asahdoh thei zeh in The 4th Laijon Digest Miuzeeko Awards ading in laijon ho akuon in deilhenna sangtah achang in ahi. LDMA a laa asah apatna hiding ahi’n, laijon ho’a ding in thanop umchuom lheh ding in ginchad ahiye.