Kikhen telna Chavang Kut

Chavang Kut lolhingtah in chai in aum kitta’n, kipa aum lheh jieng’e. Ahinla laijon ho lungthim sung’ah kipana achamkim zou mong mong tapoi. Miss Chavang Kut 2010 a ding in meilhei nungah khat lhendoh in ahung um kittai. Amin zong seida jieng’u hite. Jachad chad aum’e. LD 2008 November issue’a The First Word ah Chin Kuki Mizo chate lah’a nungah melhoipen Meilhei tithu inasun uvin ahi. Hiche thucheng hi zahda aum lheh jieng’e. Ahinla tukum in zong angaima leu ahikittai. Eiho’a ding’a guolnop lienpen ahitoh kilhon in Miss Chavang Kut ho’a ding in kipaman tamtah tah guon pieh in aum in ahi. Dangka Lakh Khat kiti chu todna ahi tapoi. Eiho nungah khat’a ding’a ahinkhuo kisiemdohna thei hi’ah ahitai. Hiche zong chu thuchuom hitaleh, eiho nungah melhoi kilhenna’a meilhei nungah lhendoh’a aum zing hi ipizeh mong mong hintem? Nampi sung’a mihiem aphatsah alhom lheh jieng’e. Hinla committee ho’n abawl zing’u zong hi azeh khat um hikit tei ding ahiye. Tuchung State Level Chavang Kut achun thinglhangmi alhom lheh jieng’e atiuve. Kuki chate sang in zong meilheiho atamjoi akiti nalaised’e. Iki gopkhomnadi’u State Level Chavang Kut’a mihiem athanop tahlou zeh in aning ning’ah Chavang Kut i-mang tauvin, hiche hi eiho’a ding’a kikhentelna khat zong ahikittai. Kigopkhomna ding mun’a ikigop thei tahlou zeh uvin ikikhenna’u asuohdoh jota’n ahi. State Level Chavang Kut hi eiho gamsung’ah, eiho milah’ah kimang henlang hileh aning ning’a Chavang Kut manna hi umlou ding ahiye. Suhkhiel vang chu ana lien behseh ahitai. Hiche siemphat ding chu thilbai hitapuonte. Siemphat tahsang in Khupting le Ngambom thusim abilkuol’a khatvei jiengcha zong gingkhalou ho choisangna ding in aum jota’n ahi. Kumkit akuon’a meilheiho’n zong cultural dance abawl uva ipiti’em? Hiche zong chu hung gamla talou maithei ahiye. Tu’a thinglhang gam achu’u ahung lolhin’u leh naicha hiding ahitai.
Chavang Kut thu’a hin sei le sah tamtah aum zing in ahi. Ademho’n zong i-dem zing uvin, abawlho’n zong abawl ngai’uh akibawl zing uvin, parallel a chie ihitah zeh uvin iki suhtuonadi’u agamla lheh jieng tai. Nam vangse kiti chu eiho tilou adang zong um tapuonte. Ahinla pailhah thei jieng hilou ahizeh in asiemphatna ding’a mitin in panlah ding chu adamdawi phapen ahi jiengtai. Hiche sang’a akhoh cheh kit khat aum nalaiye. Mitin in pan alah vang’a lamkaiho’n mipi alamkaiho’u thusei angailhah piehlou’u leh lolhinna umdieh louding ahiye. Hizeh chun lamkaiho’n zong amaho deibang hilou in mipi deibang in khatvei jiengcha hizong leh vai eihin hompieh le’u deisah ahipen tai.