The First Word - Tribal Holocaust (LD October 2010)

Manipur CM O. Ibobi in CCPur census akhang nasa behseh’e ti’n mopuohna neiho’n themkhat asuhniem ding uvin hedsahna thuphuon ananei in ahi. Hiche thuphuon kidangsa val in CDSU in SDO/CCpur office akuon in file tamtah ana podoh uvin ahi. Hinla Power Minister Phungjathang Tonsing toh kihouna aum zou in anung piehlud kit tauve. Thil kidangtah khat vang ahiyie.
    Manipur CM O. Ibobi in ahedtei ding’a poimo khat chu mihiem census akiemsuh ngaipoi ti ahed angaiye. Akiemsuh theilou zeh’a khang ahi’n, akhan chu lungdon ding le datmo ding imacha aumpoi. Kum 10 sung’a mihiem sang tamtah pienbe ding ahi’n, chule Maotaam kiel lhah laiya neh le chah ding neilou zeh’a thinglhang lam akuon’a mihiem ijad hung kichoulud ham ti zong khuoltuoh angaiye. Mizoram akuon in zong mihiem tamtah ahung pemlud’e tizong hed angaikit’e.
    Tu’a CM thupieh bang in mihiem suhlhom ding hitaleh.... ipi itidi’u hitam? CDSU panlahna hi phatah’a tosot angaitai. Jesu apien chun Herod lengpa’n pasal chapang kumni’a lhah nuoilam ana sumang in, hinla Ibobi in apilhingsa zong suhmang ding aguo’n ahi. Innsung khat’a mi 8 umna techu mi 2 akilahdoh hung ngai intin, mi 8 te chu mi 6 bouseh hung hiding ahi tauve. Hiche chu leisiet chiedol in angaina ahi tapoi. Chule enumerator khenkhat akuon’a kazahdan in supervisor in innmun’a umlou ho sumang jieng’un eiti uve atiuve. Innmun’a umlou sese chu India khuo le tui hina changlou ding hitauvem? Tuchung’a O. Ibobi in thinglhang mite ama thuneina’a asuhmang guot hi Hitler in Jews mite ana thagamna toh tekah thei ahiye. Hiche hi eiho’a ding in holocaust ahitai..
    Amasa’n thinglhang gam ahin chu uvin, tuhin amihiem in eihin nokhum kit tauvin ahi. Hiche hi tin le haa toh kithuo’a doudal angaitai. Manipur gamsung’a i-chen uva nuno chabang’a eikibawlna zeh uva PM kom’a memorandum ijad ludtam? Tamtah vei hitante, aphatchuomna ipi um’em? Mipi heddoh thei ding aum hih laiye. Mi’n hibangse’a eibawl laitah uva eiho phung le chang thu’a buoi buoi nalai zong tamtah i-umkit taleu uve. Ngolman pieh ding hileh eihohin kilawmtah’a kipaman i-sandi’u tahsan aum’e. Thakhat pankhom phad ahitai, ka laijon. Lungkhat thakhat in dingkhom’u hitin, i-gam leisiet’u kihuhbit tau hite. Thisan’a gamlah ding hizong leh mi akimansa ahitai. Eiho’n thisan luong in gam le guo i-huh ngam nadiuvem? Koi hizong leh pu le pa’n thisan phalngam’a ana huhna gam, Pathien in eipieh’u gam le leisiet eihin chu tachan’u chu melma ahijieng’e ti haimil poute. Mihiem apung zing in, leisiet apunbe theipoi. Iki huhtub lou’u leh itu ichate uvin gaaljam ahinkhuo ahin mandi’u, hiche nikhuo tieng chule alhasietna’u mitlhi tui vadung bang in hung luong inte. Hiche ding chun phal pou hite.