Miphalou - (LD Ocotber 2010)

Numei pha le pasal pha lhengdoh ding in nganse in um tale chun ipi nabawl tadem? Koi tobang hochu numei pha hi’a, koi tobang hochu pasal phalou nahisah tadem? Lungdon vang umthou vehta...! Mihiem khat chunla midang kom’a aphatna bouseh avetsah ding hikit’a. Achuti ahitah leh numei pha le pasal pha lhendohna’a chu mark zero bouseh imudi’u hitam? Aphapen lhendoh ding vang chu ahahsatna tamlheh inte. Atao tao jieng nu/pa zong chu a innvengte kiseisah leh uisei ahsei in seikit uvintin, social a hung kipeho chula mi’n judawn had, sum nehguh had hin tikit taleu, koipen chu aphapen’a lhendoh ding ahi tadem? Aphapen lhendoh ding ahahsat toh kilhon in aphalou lam zoh kive leh.
    Numei le pasal i-seikhom leh asei ahahsa’e, hizeh chun numei bouseh ana sei phot tadi’u hite. Lungthim nohphah louna ding’a kichieh sel sel in sei leuhen ahijieng’e. Guollhang khat chun akilungsietpi nu jieng zong mipha ahile hilou amoh heddoh jieng theilou ahiye. Chuti ahileh adongmanu chu poison ivy atiho’u ana hikha taleh khonung’a akisihna ding chu i-gel pieh leh lungsiet aum behseh jieng’e. Chule guollhang dang khat kitma chun nungah khat guhthim’a ana lungsiet zing ahitoh kilhon in alhangai lheh jieng’e. Nungahnu zong chun hope ahinpe kit nalaised’e. Hiche nungahnu hope pieh chu kineppi thei hope hinam? Ahilou leh hopeless kitiho ana hikha taged dem?
    Guollhang ho khonung’a akisih lounadi’u gelkhohna jal in anuoiya hin numei phalouho umchan point 10 ahung kitahlang in, hiche akuon in na nungahnu chu damsung’a nalungsiet tei tei thei ding hinam ti nangma’n naki lhen ding ahi maitai. Khonung’a Love Guru kom’a hepu, ka khuti’e... ka khati’e... ti aumlouna ding in.
    Numei ti’a akilungsiet siet vang in konkhat hin kiphatsahna cheng in aneilo uvin ahi. Hiche tobang numei ho umchan chu anuoiya hohi ahi:
10. Phone la lou
    Pasal hohin numei phone number athum uva pieh ahi’u leh aki thang-at thei lheh uve. Ahinla a call tieng’u leh wrong number ahilou leh phone lahlou in aum jitai. Hiche tobang’a pasal kichepna’a nei nungah tamtah leisiet chung’ah aum’e. Nang’a tithim thim nu zong hiche tobang hochu hi’am? Ahileh seitam umlou, kick out...!
9. Pasal a ATM a mang
    Nungah tamtah in guollhang hohi ATM in amang uve. Boina khohtah neida’n in akisei jiuvin, sum aneh pieh pieh jieng uvin ahi. Chule pan dukan apat restaurant changeiya guollhang ho sum’a alol vah vah jieng aumkit uve. Chule guollhang khat in adeichad thim akihed uva ahileh lungsiet lou ding hizong leu chomkhat ATM a aman thei ding ahinah leh hope themkhat apeuvin, adudu’u nehna’n amang uvin ahi. Hiche tobang numei hochu numei phalou lah’a number 9na ho ahiuve.
8. Substitute in pasal amang uve
    Guollhang khat chu nungah pha khat in alungsiet behseh lou’a ahileh akom’a lungsietna thimthu agalel zong leh ana nop pieh puon, laidang leng ding in ana lhadoh jitai. Nungah phalou ho’n vang, phad chomcha zong achangseh uva hinkhuo manding hahsa asah zeh uvin akilungsietpi bawl uvin, hinla alungdei bang guollhang dang amu tieng’u leh guollhang masapa chu apehdoh ji tauve.
7. Guollhang lhepna ding in luonlhi amangcha uve
    Guollhang hohi nungah ho ahung lhisuo tieng’u leh alaina thei lheh uve. Hizeh chun akom uva um nungah khat alhasiet’a alhisuo ding aphal pouve. Hiche chu nungahho’n pansatna’n anei uvin, guollhang khat akuon’a ngaichad khat aneitieng’u leh nungah phalou hochun lhase tah’a lhisuoh hileh kilawm awm tah in thu asei jiuvin. Hiche tieng chule mi lunglien guollhangpa chun nungahnu kipana ding in abawlding’a asei zouse abawl pieh jitai.
6. Thagum zong apan uve
    Pasal in numei avoh leh pasal pa chu eiho chonda’n in michavai akiti’n ahi. Hiche zeh chun pasal hochun a tijad man’u hilou in michavai kiti ding noplouna zeh in numeiho avoji pouve. Hiche chu numei phalou hochun ana hethiem thei talou, amazoh in pasal ahin voji’e. Azehchu ama’n pasalpa’n ahin lethuh lou ding akihed ahiye. Hiche tobang’a pasal chung’a khutlha numei chu akhutlha zeh’a numei phalou kiti ahipuon, pasal in alethuh louding aheddoh theina lungthim zeh’a chu numei phalou kiti ahiye. Numei phaho’n hiche tobang chu ageldoh thei pouve.
5. Mi seisiet khoh salou
    Numei zouse’n mi seisiet abawl’e kiti leh kiha seikhiel behseh puonte. Ahinla kholai dung le milah’a adongmapa todna’a mang zing leh aguollhangpa seise ngam nu chu iti numei pha kiti ding ham? Milah’a aguollhangpa zumsuo zing numeinu zong chu numei pha kiti thei puonte.
4. Thu a im uve
    Guollhang in nungah chu ahelding mong ahiye. Nungah phaho chun dongma neisa ahi’u leh kei ka-ong tapoi, ka’u Boipu toh kakilungsiet tai anati uvinte. Nungah phalouho’n hiche chu aseiji pouve. Dongma neisa hizong leh dongma neilou bang in aum uvin, adongmapa hedlou in guollhangpa chu ana kilungsietpi inte. Hiche tobang nungah hozeh’a chu guollhang tamtah kinahlo ji ahiuve. Amaho chu bengkong lanu zong akiti.
3. Sex in guollhang ho a control uve
    Nungah phalou chun guollhang khat adeichad’a, guollhangpa’n amanu adeilou tieng leh amanchah lah’a aguneipen anih nuoiya akoihe chu ahin podoh jitai. Guollhang chunla nungahnu manchah poimopen chu atha lhahsam bailamna pen ahikit ji zeh in thaang’a chun a ohkha’n, kholaimi’n ahin heddoh ding noplou zeh in nungah phalounu chu damsung’a kichenpi ding in lhali lhanga naovop ahung hitieng leh akipui jitai. Khonung’a akhuol’u leh ama bouseh hilou in lampi’a chiesuh chietou guollhang zouse touna thei public carrier atiho’u ana hikit jite.
2. Pasal ho alunglahna’u
    Guollhang khat chu alawi aguol hotoh munkhat’a chiedoh ding’a akisah’u nungah phalounu chun aheddoh tieng leh guollhangpa chu phone abawlji’n kimutuo hite... nalawi ho le kei koizoh nei gelkhoh zoh ong?....adu ada... asei uvin guollhangpa chu alawi hotoh akivop ding thangsiet man in akoudoh jitai. Guollhangpa chunla alungsiet ahikit zeh chun alawi aguol ho kom’a chiesang in anungah phalounu kom’a chun achie’n, kin khoh zong ana um diehlou, moh’a na lungthim kalah ahibou’e, kei le nalawiho koizoh na gelkhoh zoh’em ti’a.... tiho pou in nungah phalounu chun ana dawnbut ji’e. Mi sugenthei ding’a hung pieng ahiuve hiche tobang hochu.
1. Mi engse
    Na kilungnoppi khah’a ahileh a engsiet dan chu.... guollhang dang hotoh nang mumuna ding in ga umkhom uvinte. Guollhang dang hochun la azeh dang imacha ding’a ana kivoppi kit talou’u, angongkoi uva akhut’uh asaosah’u leh kichai.

Alangkhat’ah pasal zouse chu apha ahisuoh kei kit diehpoi. Nungah phatah tah guollhang phalou tah tah toh kilungsiet khah zeh’a alungthim kehden’a, siemphat hoi hitalou ding’a lungthim gentheina anathuoh zong tamtah aumkit’e. Hiche tobang nungah hochu Love Guru in apuohnatpi lheh’e. Guollhang phalou tah toh kilungsiet khah ding tijadna’a gelthei nungah hochu miching ahiuve. Hiche tobang nungahho’a ding’a guollhang phalou ho umchan point 10 ana velha kit’u hite.
1. Ama bouseh ching kisa
    Ama bouseh ching kisa guollhang hochu midang in zong ching asa diehji pouve. Thukhat aseiya adihlou ahi aheddoh nung’a zong niellel keiya khang guollhang tamtah aum’e. Hiche tobang guollhang toh kichensang’a chu toko homsung’a molkang khat phulud’a valele anopjoi atiuve.
2. Alungludna ho gelkhohlou
    Mihiem zouse alungludna akibang suoh keipoi. Nungah le guollhang zong alunglud lhonna kibang puonte. Guollhang phalou pa chun ama lungludna bouseh agelkhoh in, anungahnu lungludna agelkhoh pieh poi. Hiche chun nungahnu chu imacha’a amulou tina ahiye. Imacha’a nahin mulou guollhangpa toh na damsung nachenkhom lhon ding ngaituo tiem in. Ol in hung kisiempha nante ti’n kinem hih in.
3. Mit kholai leng
    Zummo thu hilou in, pasal in nungah nawi avet chu vannuoi leisiet pumpi hed’a thil chiena lhangpi ahiye. Ahinla pasal phalou chun nungah nawi avet tieng’u leh alhasuoji tapouve. Nungahnu chu guollhang dang toh kivop ahikhah leh jaana pieh angaiye. Chule nungah khat anawi lhalou hiel’a vet kiti chu thil phalou ahitai. Guollhang phalou in a nungahnu toh aumkhom pedtah in zong nungah dang nawi ana veji’n, alunggel ana vahmang jitai. Hiche tobang guollhang zong chu tahsan thei guollhang ahipoi. Nang hoi nahin sahpen ahivang’a nakichen zou lhon tieng leh ama mit’a numei melhoipen chu midang jinu ana hikit ding ahizeh in phad kizen pedcha chun dalha loi jieng in.
4. Numei chung’a kithuneisah
    A nungahnu’n asei zouse nop piehlou guollhang chu iti guollhang pha kiti thei ding ham? Hiche tobang guollhang kilungsietpi kha’a, akhenje helou nungah zong vang chu nungah ching hitapuonte. A nungahnu house zing jieng, numei zouse gaosap sap jieng, ahivang’a alawi le guol khat in adongmate’u aseiphat leh alawipa dongmanu chu ngam jieng guollhang zong aum’e. Hiche tobang guollhang toh kilungsiet kha hochu Love Guru in alungsiet behseh’e.
5. Deida’n kibanglou
    Guollhang phalou hochun kivoppi ding in nungah ajalen zep zepho alheng nuom uve. Kilungsiet hinkhuo mankhompi ding in nungah aki lhathaang ho adei diehset uve. Hinla jinei ding akiti tieng leh hou-inn chie zing nungah kitah adeikit uvin ahi. Hiche tobang guollhang hochun a dongmate’u milah’ah akivoppi nuom pouve. Guhthim hinkhuo amang zing uvin, guhthim in akhen jiuvin, aphada’n da’n in jinei ding agel jiuve.
6. Maipha hol
    Guollhang phalou hochun amaho mitmo seldohna ding in anungahte’u lung hatah in ahol jiuve. A nungahnu alunghan ahedthim leh phone abawl in, akam anemthei pen ding asunem in, mi ngailutah bang kisa’n kampao alhadoh theiye. Hiche tobang guollhang hochu tijad aum diehset uve. Mihiem lhamval thei uvinte akiti. Nidang’a a nungahnu’n phone abawl zong leh labehseh jilou, nungah dang toh ginmo’a aum tieng leh khen’a aum ding tijad man’a phone bawl matchet guollhang ho akuon in chingthei’o ka laijonnu.
7. Ki show
    Pasal in numei natoh akithuopi leh numeiho’a ding in ajangkhai lheh jieng’e. Ahinla guollhang phalou hochun amaho bawltheina lampang thil khat nungahnu’n abawl leh midangho muding chun mi pontho tah bang kisa’n, nang ana tou in, ken hin bawl nang’e ati jiuve. A innkote’n anganse le lah toh ngapchad neikit lou, nungahnu muding’a hung ki show. Hiche tobang guollhang chu na kichenpi leh khonung tieng leh natoh zouse nachangseh’a natoh ding ahi kihed masat’o.
8. Mi hethiem theilou
    Pasal sang in numei hi alunglhom zep in ahi. Hizeh chun akipana’u le alhasietna’u zong pasal’a sang in aneojo ji’e. I-ham ti’a nungahnu thil neokhat chung’a ahung lhasiet khah leh guollhang phalou hochun thulahlou atipai jieng uve. Nungahnu lungthim puohgih dawn jangkhai pieh tahsang in puohgih ahapbe pieh jo uvin ahi.
9. Lawi le guol ngaicha zing
    Lawi le guol ngaicha zing guollhang toh kilungsiet chu lungthim gentheina ahiye. Adiehset in kichen nung tieng leh ahahsatna asang diehset’e. Romantic tah’a amani bouseh in hinkhuo amankhom lhon ding’a nungahnu’n agelna mun zouse’a guollhangpa’n alawi ho ahin pui zing leh nungahnu sang’a alawiho akhohsah zoh tina ahitai. Hiche tobang guollhang zong chu nungahnu’n guollhang pha tingam puonte. Olebah...?
10. Mi umhal
    Kimutuo phad sieh’a nupa hinkhuo man ding gel zing guollhang chu mi danger ahitai. Hiche tobang guollhang chutoh nakichen leh khonung tieng leh nahin chimchah intin, athah thah ahin holbe ding, gentheina kamcheng in aphuondoh zoulou ding ahitai.