Child Scientists zong i-nei tauve - LD October 2010

18th National Children’s Science Congress 2010 State Level competition anaitah toh kilhon in Laijon ho hedding deina in 17th NCSC ahung kitahlang nuom’e. 2010 kum’a chun i-laijon chanpi’u Mr. Haominlien Lhungdim, VK Tawna College XI (Sc) simchun District Level competition a CCpur a ding in lhendoh in ana um in, State Level, Mangolnganbi College Ningthoukhong’a ana umkit in, hiche a zong chun lhendoh in ana umkit’e. All India Lelve NCSC chu Ahmedabad (Gujarat) a Dec 27-31 2009 sung chun ana um in, India pumpi’a project 169 presentation lah’a 2nd position in ahung pang kit in, North East le Manipur ading in 1st Rank ahung hitai. Hichan’a gei hung lolhing zou Mr. Haominlien Lhungdim ikipapi uve.
    Ama lolhinna akuon’a laijon dang hiche lam’a lungludna neiho’n kitilkhouna’a aneitheina di’u gelkhohna jal in LD Contributing Editor Pu Khupminthang Khongsai in LD thalheng in ana houlimpi’n, hiche chu anuoiya hin ahung kitahlang’e.
    Mr. Haominlien hi Kamdou Veng, Tuibuong Khopi’a cheng Ml Lhunlet Lhungdim le Nl. Noulam chapa ahiye. Lekha simna lam’ah VK Tawn’a College ah akaiyin ahi. 17th National Children’s Science Congress 2009 ajao ding’a Manipur akuon’a lhendohna amutoh kilhon in Ahmedabad mun’ah ana khuolzin in ahi. LD toh aki houlimna’ah Haominlien in kol le vai lekhathiem le lhuoh kichiem tahtah holah’a ama agajao jieng thei chu kidang asa’n, lolhinglou’a innlam hung kinungle ding hizong leh hichangei agalhun zou chu kipana’n agel in ahi. Nervous pum pum in a project Land formation of Churachandpur, Noosphere sub-theme nuoiya abawl chu aga peludta’n ahi. Haominlien in aseina’ah Hall pamlam’a ka um’a judge ho’n ka project eidoh sao sao phad’u chun kalunggel’ah kinepna khat kaneita’n ati’n ahi. Akinepna bang in Grade ‘A’ amu’n, Child Scientist title chu pieh in aumtai.
    CCpur Old Gelmuol gamsung’a suong ho study abawl’a hiche akuon’a chu a project ahin suh bulhing ahida’n aseiyin ahi. LD in hiche project na boipina’a nathil mudoh themkhat nasei theidem ti’a adohna’ah Haominlien in Old Gelmuol gamsung’a suongho sample 10 tobang kachom khom in, properties ho kave’n, rock testing laboratory a kabawl in, suongho chu atamjo ripple mark aum suohkeiyin ahi. Hiche’a pat’a ka phuondoh thei chu agamhi phat khat laiya chu Tethys tuipi nuoiya ana umkha ahiye ati.
    Ahmedabad mun’a chun Haominlien in Prof Yashpal toh kimutuona aneiyin, hiche’a chun ama’n 2012 a leisiet chung Nibiru in ahin seding thu adong in ahi. Prof. Yashpal in adawnbutna’ah hieng’e adih’e, Nibiru chun leisiet ahin sekhah ding ahinai, ahinla scientist ho’n tulaitah hin hiche daldohna chun nasatah in pan ala uvin, hung lolhing tei uvinte zong ati’n ahi.
    Haominlien in NCSC a kajaona akuon in thil tamtah ka phatchuompi’e ati. Hiche holah’a ama’n mi zouse’n azuiding’a pha asahchu leisiet’a thil hohi moh tahsan lou’a, khuoltuoh masat ding, ginchad thu moh seilou ding tichu ahi. Chule India akuon’a scientists minthang tahtah hotoh akimutuo’a anop nop adohthei chu akipana lienpen ahiye.
    LD in na laijon ho’a ding’a seinop nanei leh ti’a adoh leh Haominlien in NCSC hin science lampang’a thanopna pekhat ahizeh’a pantei ding, guollui thu suhtuo’a kichadna ho tukhang’a pailhah ding, mepohme me jiengte, thinglhang mite ti’a kigel niemlou ding, itoh i-tham zouse’a Pathien suon ding, eima hedna’a kisuon louding, inn’a eima lunggel bou dih sahlou ding, mihiem chankhompi hotoh lunggel ho kikheltuo, kihedtuo ding, kichang chihsah bawllou ding ahinti lha jieng’e.
    Laijon Haominlien Lhungdim hi India govt. in phalna apieh phad leh India a simlai ho thalheng’a International level competition a pang ding ahitai. Ahung lolhin toupeh ding ikineppi uvin, Pa kom’a zong i-thum pieh uve.