Chibtility

Sum kitihi mi zouse’n adeichad pen anahi’n, tu’n zong ahi nalaiyin, ahung hitou peh nalai ding zong ahiye. Chapang amitlam keopan ho’n zong sum adei thei lheh jieng uve. Hibangse’a mitin in adeichad sum kitihi mihiem zouse’n hatah in hao henlang, haman’a aman’u zong leh kiemlou hiel in umthei leh deisah ahiye. Ahinla hiche chu ana hiji tahlou zeh in mihiem’a ding in kipana achamkim zou poi. Alangkhat’ah mihiem kitihi Pathien in ulsa luong’a nehhol ding’a ana gaosapsa ahitoh kilhon in ulsa luong tahbeh in sum le pai i-holji tauvin ahi. Genthei tah’a sum le pai ahin holdohho’u chu mihiemho’n adei thei lheh uve. Ichangeiya adei vang uvin phad sodtah amaho khut’ah aumden thei jipoi. Mi bangkhat chun midang’a bat’a analah’uh ditdohna ding in ulsa luong in sum alo jiuvin ahi. A khenkhat chun bat ahilou vang in amanna ding umsa in sum alokit jiuvin ahi. Adangho chun aneibe chehna ding uvin alokit jiuve. Anehchaisa ditna ding hihen lang neibena ding hizong leh mihiem koima’n mohseh in sum le pai apaimang nuom puon ahi. Mohseh’a sum le pai sumang kitiho zong khun nullah ahilou leh dust bin’a amoh paimang’uh ahi diehpoi. Ipiham khat bawlna’a ana kimang ahiji thou thou’e.
Hiti’a sum hinlo mihiem hochu asum mandan’uh akibang jipuon ahi. Mi konkhat hochun sum anei’u leh tuiluon in aluonsah uvin, abang khat hochun sum mikhut’a piehdoh ding hahsa asathei lheh uve. HIV aki zenzen vang’a adamthieng theilou bang in mi bangkhat hochun mi’n bat agasuh suh vang’a suhdohmo hiel tamtah ana umkitji’n ahi. Haosat ding lunggul behseh’a sum id zong tamtah aumkit’e. Sum hatah’a a-id zeh’u chun sum ahin hao tieng’u zong leng a-id id nalai uvin, amangdoh ngamji pouve. Aduchad khat’u zong nengamlou in aum uvin, amaho thinung tieng leh asum’u chu siki zong aki puoh theilou zeh uvin leisiet’ah dalhah in aumji’n, mi khenkhatho’a ding in cha le nao, innsung mite sum kichu in abuoidenji tauve.
Khosung le houbung sung, munchuom chuom’a kai le don aum tieng leh chengkhat zong pehdoh nuomlou’a sum id zong mihiem ana umkitji’n ahi. Hiche tobang mihiem hochu LD in chibtility ati’n ahi. Sumhol hahsa chieh chieh zong leh amaho sumholna chu hahsa diehset toh akilou’e. Hiche tobang mihiem hochu amaho le amaho zong chib akisa uvin, abang konkhat hochun aumdan’u melse asathou uve. Ahinla athisan uva behden tobang’a um ahitah zeh in apailha thei pouve. Talab, raja, khaini ngol ding hahsa nasah chuna? Hiche tobang’a chu amaho’n zong ahindan’uh adei dieh pouve. Hinla dalhah ding hahsa asah’uh ahitai. Milungsiet umtah ahiuve.
chibtility lah’a jao mihiem konkhat hochu mi’n hatah in aseise jiuvin ahi. Seisiet’a um vang nuomlou hiel hichu’o na? CHIBTILITY zouse chib akisa dieh suohkeiji pouve. Amaho le amaho aki ngaituo tieng’u leh huongphal akisa uvin, hinla koima’n huongphal asa diehji pouve. Hotel’a alawi aguol cha khon khat khatvei achoh leh sei sei jieng, huongphal kisa mama, mi’n ama choh pieh naho geldoh’a nei theilou, ohe... adaa ahiuve, mi’n avetsiet lam’uh akiheddoh thei ji pouve. Ka Laijon ngaitah, nang zong hiche tobang hiding’a chu naki ginmo’em? Hiche tobang chu na nahi khah leh kholai’a smart tah’a nava lele vang’a chu na nunglam’a mi seisiet nahi zing ding ahiye. Mi’n nahin seisiet nang zahcha hih zong le chun na innsung mite’a ding’a zumna ahikit thou thou’e. Chule nahin lungsiet ding le nahin khotuo ding zong mi um puonte. Lampi’a chu konba nang maichang tah’a kahin vetda’e ahung tiding ham? Gentheina nathuoh tieng leh nahin kithuopi ding milhom lheh jieng inte. Laijon holah’a CHIBTILITY ijad i-um diuvem? Iki heddoh uva iki siemphat theina ding uvin anuoiya hin thudohna 6 aum in, hiche hohi hin dawnbut in lang, sum le paiya itobang mi nahi hin kiheddoh in.

 1. College a English teacher nu farewell gift chohna ding in na lawiho’n `100 chieh adong uvin, nang in....
a) Na penuom poi. Von chohna ding sum nakhol zeh in `100 piehdoh ding chun nang nahin tohkhat tei ding ahiye.
b) Nalawiho’n ahin tuo le tuolou donlou in bazar’ah nachie’n, gift nacho’n, nangho class min in na pedoh jieng’e.
c) Sumdong ho khut’ah sum chu na pedoh paijieng’e.


2. Na naote sum neilou khat toh bazar nachiena’ah von adeitah khat amu’n, nang in....
a) A von dei chohdohna ding’a sum kikhol ding in nahil’e.
b) Adeichad pen chu nachohdoh pieh pai jieng’e.
c) Adeichad  pen chu nachohdoh pieh in, ol’a sum ahin nung sahkit ding in naseiye.


3. Scholarship nalah nikhuon nang in....
a) Sum chu namang heh poi. Sum kholdoh chu sum lodoh ahiye.
b) Na lawi naguol hotoh party nabawl in, na mangchai pai jieng’e.
c) Von themkhat naki choh in, jingkah meding bongsa kg 2 nacho’n, adangse naki kholtub’e.


4. Na lawiho B’day wish bawlna ding in nang in....
a) Archies card khat nacho’n, LD a zong B’day wish nabawl pieh’e.
b) Moreh’a napuiyin, Namphalong’ah bazar nakaipi’n adei dei nachoh pieh in, surprise bawlna ding in LD a B’day wish nabawl pieh’e.
c) Ama’n anei zoulou adei mama jieng thilkhat nachoh pieh in, LD a B’day wish nabawl pieh’e.


5.  Talab `5 a nachoh’a 4 bouseh nahin pieh’u leh nang in...
a) 5 hiding ahi ti’a naphun’a pan dukan neite nakinielpi jieng.
b) 3 hizong leh khohlou nati toh kilhon’a abahlud tho jieng.
c) Phun chiellou hiel’a 4 kilah’a innlam kizot jieng.


6. `100 nanei leh na manchahna ding iti na hisabji’em?
a) Deichad tamval, choh ngam umlou, sum bawm sung’a moh koiden.
b) Bazar’a chie ding’a lawiho khat le ni kou’a du du ga moh neh.
c) Mobile balance bei zeh’a top-up bawl, adangse akit’a ding’a koihe.
Achung’a thudoh ho na dawnbut dan akuon in na chibtility percentage ana kivet jieng to...

DAWBNUTNA

Na dawnbutna chu atamjo...
A ahikhah leh nang vang ge.... chibtility nahi jieng’e. Nang huongphal kisa lheh zong le chun nanunglam’a mi’n michibnu/pa ti’a nahin nuisat sat jieng’u ahiye. Sum kanei pou leh anuom nuom in eihin seise hen nati’a zummo tah’a na vanda le vang chun mi zouse vetsiet na nahiye. Hizeh chun kithahsiemna ding na ngaituo masat pen angaiye. Nang chung tilou in midang chung mong mong’ah sum naseng nuom puon, midang in zong nikhuo khat tieng leh nang chung tilou midang sese chung’a sum asennuomna phad hung lhung tei ding ahiye... chingtheiyin.

B ahileh..... a imatih chan’a inn cheng dohlou ding nahikit’e. huongphal-tility nahipuon, ngol-tility nahijoi. Jing’a ipi hung lhung ding ham ti gellou hiel’a sum moh suh chadvai kiti chu nang nahiye. Nang vang koima’n nahin seise puonte. Mi zouse pachad nahiye. Ahinla nang mi’n nahin pachadna chu manthahna ding’a ki pachadna ahiye. Sum kitihi ulsa luong’a kilodoh ahi’n, thingphung chung’a gaa jieng lou ahiye.

C ahile vang.... sum le pai lam’a mi chingthei tah nahi’n, namuna atam nah leh lolhing lheh in nate. Apieh phad le a id phad nahe’n, sum kholda’n leh sum veipung da’n zong nahekit’e. Sum veipungna lam’a na mantras chu laijon ho hedding’a nahin phuohdoh’a pha ding baha...??