Maxxy's High School Life

Maxxy Minthang

LD Best Pop Singer 2009 Maxxy Minthang in tukum kim don chun koppi ana neita’n ahi. Jinei hinkhuo ahin mantoh kilhon in sanakhang dalhapa chu ahi maitai. Nungkou kit ding nuom zong leh nungkou thei ahitah lou toh kilhon in Maxxy ading in maban khankho ding ngaituo pum’a phad chiesa ho lung’a geltho tilou adang bawlthei imacha aum tapoi. A sanakhang pamai asah mama hileh kilawmtah in tuhin Maxxy in album thah khat tulha sung’a record ahin patkit ding ahita’n, hiche chu high school life ati’e. Koi tobang Maxxy Minthang High School kai laiya nungah ana helkhah aum leh tu’a ama album thah’a hi laa khat le ni kisah khumna hung umtei ding in ginchad aum’e.
HIGH SCHOOL LIFE a laa asah dingho Maxxy in aseidoh nuom hih laiye. Hiche hochu David Kakap le Thangjangam Khongsai in music abawl lhon ding ahiye. Musician teni’a ding in zong Maxxy album HIGH SCHOOL LIFE hi album poimo tah hung hiding in aum’e. Azehchu Maxxy ngaisang’a alasah ana ngai zing ho’n koi music ngeijo’em ti’a vetlhahna aneina’u zong hung hiding ahiye. Hizeh’a chu theitob suo’a athepna lhon zouse ahin puohdoh lhon ding ginchad ahikit’e. Music asiem khom lhon ding kitihi kithuo khom lhon ding tina ahipuon, laa chuom chieh aboipi gel gel lhon ding tina ahijoi.
Maxxy Minthang hin album ni (First Letter I & II) ana release akuon in nasatah in minthanna ana kimu’n, chule First Letter I a laa khat zeh in chabel dopna zong ananeita’n ahi. HIGH SCHOOL LIFE a vang hi chabel dopna aum tahlouna ding’a Maxxy in zong laa aki lhenchil tei hung ngai ding ahitai. LDMA tieng leh Maxxy in laa thah sah ding anei tina zong ahikit tahzeh in laijon ho’a ding in thanop um chuom tei lheh inte.