Result suoh le nang ipi tidi? - LD May 2012

Tukum  Kum 2012 thiemvetna  BSEM le COHSEM tohguonna nuoi in February lha’a anakipan chu, ihmulou’a jaan hah Laijon Candidate ho ding in lung navah umtah in ana kichaita’n ahi. Bawl hoi le bawl hoilou chu achuom in koi tadi leuhen, kiguizoppi Laijon thiemvetna’a pangho thumopna akinei nuom in ahi.
Exam zou tieng Candidate tamtah in ka result ipi ati ding kahepoi, asiet/aphat chu Answer Script Check ding khut’a kingam ahitai ati jiuvin, hiche hi Laijonho seiding in vang pha akisapoi. Katina chu, exam chu abawl nangma nahi’n, asietding le aphat ding chu nang in na hedsa ahi. Na division ding le na percent muding jad zong result suo masang’ah naseithei tai katinuom’e.
Laijon lekhasim gunchu mong-mong khat nahi le.. ve’n exam first day apat chun inn nalhun sieh leh, tuni hiche subject ahin hijad mu ing’e ti’n mark muding’a nageljad chu khuoddoh peh lechun achaini leh hiche hi ka total mark ahi’n, hiche division hing katin, ash! ka percent zong hijad hi alhung zou’e nati thei ding ahitai. Ahileh… subject wise a mark nang-le-nang nakipieh chu result hung suo tieng ve le chun, naki geldan sang’a zong lhomjo thei, naki ginchadna sang’a zong tamjo thei ahilou le nangma khuoddoh jad chu toh zong hung kituoh chet jieng thei hinalai ahi. Naki ginchadna  sang’a ahung niem behseh leh lung lhalou in BOSEM/COHSEM office lang delpai in lang Answer Script Re-evaluation ding phu jieng in. Ahi’n innsung mite lungholna le oimo naha chan louna ding mai-mai in vang re-evaluation ding guohih in. Ajieh chu sum keo hilou’a phad zong athon’a mang ding ahi.
Kalaijon ho exam lolhing ding in kigel tadi leuhen kanuom in hichetoh lhon chun anuoi’a point hohi gah velha ute na?
1. Na exam result chu asuo masang in nakaina ding School/College geltuoh masata’n. Result bon suoh loulai, hoilang college nasei’u ham tiho khu tukhang’a ding’a Laijon Digest te’n mibanglou’a kikoi ahitai ti geldoh zing in.
2. Result suokah in nuomtah in ki umhen ti’n vah chavai hih in, mohvale lechun tuo lou-loudi touhkha’n nate. Candidate exam zou’a phad chiesa’a ihmumo toumoho a result mumanlou’a nop-le-daa umlou’a lenkhom kibawl pieh zong umdalou ahitai. Umlou nung’a 1st Div. 70% ipidi ong na?
3. Result suoh loulai’a Delhi, Shillong, Kolkata adang dang  anajuon masa’a a innsungmi sulung gimho zong Laijonte’n agelsang diehpoi. Tulai mundang’a zong admission phad kikhel leuna’a result suoh zong aum tapoi. Sum-le-pai’a innkote suhlunggim sang’a amun’a umsaho khat nganse chu dei aum joi.
4. Kalaijon, heiha, result chu ahung suohtai… kate nalolhingtai,.. hip hip hooray! Nalolhintah le gangtah in lhaijel in lang na marksheet chu internet’a ga ladoh in. News paper’a um zong leh hetchetna ding’a marksheet chu mit’a mu ngai ahi. Adih nah leh  nanu napa na innsungmi hoi’a umham holmasa’n lang kipathu sei uvin. Result suoh’a lolhing’a innlang dellou, gamlang delho vang kalaijon tiding zong thasiet um akisai. Na STAR nu, na STAR pa result buoi in buoi hih in nang lolhin chu nang’a ding’a athupi pen ahi.
5. Alolhing chu nahi tahleh School/College nadeina mun namu theina ding in natina’a chun admision form gakilah jieng in. Inzouleh guollui miho bang in original marksheet school’a ahung ana ngah kit in natin School/College hoiho’a admission mu zoulou in umkit in nate.
6. Ka Laijon, i-nu i-pate’u nursery i-sim uva pat i-subuoi tauvin, admission bawlna ding in vang sum apuohdoh pou’u le subuoilou in eimatah lhai jieng ute. Tulai alhangpi’a admission a ngaicha hochu: Downloaded Marksheet, Provisional Certificate, Admit Card chule Passport copy ni hintin anung le ahung ngaicha ding hochu: Tribe Certificate, Income Certificate, Blood Group Certificate, Migration Certificate chule  adang dang. Akisei hohi copy nicheh (Xerox Attested hiding).
7. Laijonho study leave lai’a pat’a Korea te sam ana copy ho’n zong Koreate’a hilou’a Laijon sam style joh’a naheidoh kit’u ngai ding ahitai. Samkai henhun  namit zong kimu theilou leu in admission interview tou lechun seat nang’a ding’a onglou thei ahi. Na STAR nu/pan  nasam style toh kilawm nahin sa zong leh interview board ho’n kilawm nasa pouvinte. Hoiche phajo ding ham?
8. Mitamtah le nu-le-pa tamtah hin tulaihi science stream bou agelthupi uvin, subject chungchang vang hi asim ding nu/pa toh innsungmi kihou tuoh zep angaiye. Na innkote’n science ti zongle’u najo/nalel ding nangma’n nahenai. Chingthei in. Subject kilhen khiel zong hi khonung’a ding’a thil khohtah hung hiding ahi.
Laijon 10+2  Churachandpur a sim nom hodinga anuoija hohi kilhenthei jeng ahi.
i) Bethany Christian College (Arts and Sc)
ii) Rengkai  Govt.Hr.Sec. school(Arts and Sc)
iii) Sielmat Christian Hr,Sec.School (Arts and Sc)
iv) Rayburn College (Arts,Sc and Comm)
v) VK Tawna College (Arts and Sc)
vi) DonBosco Hr.Sec.School (Arts and Sc.)
vii) Young Pillars College (Arts and Sc.)
viii) Vision Academy (Arts and Sc)
ix) Ebenezer Academy (Arts and Sc)
Ka Laijon, B.Sc, Commerce le BA Churachandpur a simnuom ho ding in zong College aki tahlang nuom’e.
i) Bethany Christian College (Arts and Science)
ii) Churachandpur Govt.College  (Arts and Science)
iii) Lamka Govt.College (Arts and Science)
iv) Rayburn College (Arts,Science and Commerce)
Manipur sung’a Churachandpur hi thiemvetna lang’a asangloi khat ahijieh’a laijon gampam’a pod zoulouho ding’a kigelna thei ding’a hung kitahlang ahi.Chuban’a School/College hi hoiche hoi pen’em chule stream subject ipipi um’a itobang bang facilities um’em tiho vang chu anuoi’a contact no. le e-mail a phatsieh’a doh zing thei hinte. #9612209553…emelyhoinu@yahoo.in
Laijonte’n matric exam lohing ding ho kathumop nuomna’u khat kit chu- Class XI le XII hi Manipur gam’a zong School/College hoi atam thou jieh hin GAMPAM chielou pha aki sajoi. Ajieh chu Class X chaipan hohi alunggel’u pilhing loulai, det loulai ahijieh uvin thilpha lam sang in aselam alabaijo uvin nu-le-pa mitmulouna’a aumdi’u chu akisuong puon, chuban’ah sum-le-pai dinmun akivet tieng expenditure zong gampam’ah asang in, sum-le-pai thot le na’n zong innsung mite agenthei uvin ahi. Ahi’n innsung dinmun in ajoding pou leh Class XII zou’a vang gampam achiedi’u zong akijada diehpoi.
LAIJON EXAM LOSAMHO DING’A THUMOP: Kalaijon Exam result asuo’a lolhinlouna nanei khah le lunglha hih in, gelmong mong in tukum 2012 a exam peho lah’a a FAIL nangbou nahipoi. Fail malah’a exam pezoulou zong umnalai ahi. Kengkoh/Kengchot hoi neiho thangse hih in, kengkoh/kengchot buna ding keng neilou zong mihiem tamtah aum’e ti geldoh zing aphai. Na fail man in zong  ama chu koudoh in lang jampi jieng hih in. Kumkit hunglhung thou thou ding ahi. Fail man in bottle hol in zong vahle le hih in… phachuom puonte. Nangma nanop jieh a fail zong nahipoi. Exam fail jieh’a khattou in kikhailih doh in panna bei ati zong le nuomhih beh’o. Kikhailih chu khatvei bou bawlthei ahi’n, exam vang chu kumsieh’a um ahi’n, bawl bawl jieng thei ahi.. Injou khat leh exam fail man in vahthangle in lang, bottle toh jaan sieh le kikhenlou in um in lang ahiloule nadongmanu/pa moh kijampi lechun mi’n LAIJON DIGEST simkhalou in nakoi untin, tulai a Laijon Digest simkhalou chula min miching in gelkit pouvin tin thilkhohtah hungsoh doh ding ahi.Hijieh chun na fail khah le lunglhalou in mi’n ipi sei zong le lungnieng tah in kumkit thanuom tah in ngah jieng in lang tu’a nasim Article hi avel vel in sim kit in.
Nabol thei chan chu Exam a na nabol ahitah le adangse  chu Pathen in ahin boldin kinemta’n.
Khupminthang Khongsai, Contributing Editor, LD