KNO le UPF kihoutuoh’a SoO hi lahdoh’a pha ham, ahilou leh chiepi zing ding ham ti seichien angaitai: Cap. Jacob Thadou, Organising Secy. UKLF - LD May 2012

Achiesa 1996 kum’a ana kiphutdoh United Kuki Liberation Front (UKLF) in March nisim 29, 2012 nikhuo chun kum 17 lhinna loupitah in Camp Nazareth - Muvanphuoi’ah ana mang uve. Meilhei thingnuoi UNLF ho’n nasatah’a Chandel gamsung’a eimiho ana suhgenthei uva, bomb thaang ana kampieh uva, ahinkhuo ana lhasuo leh mitcho elbai’a mi phabep akoi uva, haosa upaho jaana neilou hiel’a ana suhgenthei lai uva nam mite gentheina vezoulou’a hangsantah’a ana kidoupi’a, UNLF ho Chandel gamsung’a eimite chenna lah’a kuon’a ana nodoh UKLF in tukum’a kum 17 alhinna’u alop’u chun minu-mipa, numei-chapang, tehse-khangthah tamtah in ana kipapi uvin, kingapna thei mong mong’a gel in thanuomtah in programme ana mang uvin ahi.
UKLF lamkai lien SS Haokip Chief Guest hina’n programme guon ahi’n, ama ahung lhah theilou jieh in ama thakhel in UKLF Home Secretary Anthony Thadou apang in, SS Haokip akuon’a lekhathot simlhahna aneiyin ahi. Artiste minthang phabep zong ajao uvin, programme asunuom lheh jieng uve. Tuchung programme ahin Aimol Cultural Troupe ho’n zong pupa laam ahung vetsah uvin, nampi sung’a hin kingailudna le kipumkhatna in malam ason zing’e ti eigeldoh sah uve.
SS Haokip khel’a Chief Guest a pang Anthony Thadou, Home Secretary, UKLF in puonlab khaidohna aneiyin, laapi in anung azuiye. SS Haokip akuon’a lekhathot kisimdoh chun nam sepaiho hangsantah’a nampi’a ding’a pang zing ding in atilkhou’e. Chule Kuki min’a thingnuoi bawl’a, hinkhuo phalngam’a pang group chuom chuom ho zong angailudna thu aphuondoh ban’ah, kihoutuoh’a nam mite kinepna bang’a demand khat neikhom ding in tepna zong abawl’e.
Maj. Kennedy, CO, 1st Bn. UKLF in zong houlimna aneiyin, nampi sung’a lamkai chuom chuom ho’n programme ahung lhah jieh uvin kipathu aseiyin, chule nidang’a banglou’a kingailudna um’a ageldan zong aphuongdoh’e. 1996 kum akuon’a hung kipandoh UKLF in tohding tamtah aneiyin, khatvei thu’a tohdoh jieng thei ahilou jieh in banneicha’a UKLF natohna mipi’n tosot zing ding in angeh’e. Mi tamtah in thingnuoi hohi nam lamkai dan’a agel’u phamo asahthu aseiyin, nam lamkai hilou in nam sepai ahijo uvin, chule haosa upa, Kuki Innpi lamkaiho johhi nam lamkai ahiuve ti’n aphuongdoh’e. Chule nampi kiti chu thingnuoiho hilou in mipiho joh nampi ahida’n zong aseidoh’e. Nampi sung’a suhtuoh ding tamtah aum nalaiyin, adiehset in kingailudna le kilungtuona hi hatah’a lhasam nalai ahi ati. Tuchung election a Dingpi area a eimite MLA kaidoh jieng thei i-hilai uva midang khat eiho vote a i-kaidohsah’u datmo aum lheh in, hiche chun i-kilungtuo loudan’u avetsah’e zong ati. SoO kila zong hi kilungkhatna aumlou leh mohseh ahiding dan aseidoh’e.
UKLF 17th Raising Day nikhuo chun Zou Defence Volunteer (ZDV) a lamkai lien Kamkhenpau in zong mipi masang’ah houlimna aneiye. Meilhei hotoh kum tamtah ana kivop uva phatchuomna imacha aumlouda’n aseidoh in, UKLF chung’a tahsanna aneidan zong aphuongdoh’e. Kuki sung’a um tribe 22 ho kigopkhomna ding’a UKLF panlahna akipapi thu aseiyin, chule ahung lolhin ding akineppi dan zong aseiye. Phung-le-chang thu sei-sei aphatchuomna umlou ahitoh kilhon’a haisan’a, alienjo jad-le-nam phatchuomna ding joh ha boipijo ding in mipiho atilkhou’e.
UKLF in kum 17 lhin alop nikhuo chun media team in Cap. Jacob Thadou, Organising Secy. UKLF toh phad chomcha kimutuona aneiyin, hiche’a chun Cap. Jacob in Kuki bahkai tribe 22 hohi government in ei hedpi’u angaiyin, eiho kilungkhat tah’a dingkhom ding’a eihin vailhah’u ahitoh kilhon in SoO nuoiya um thingnuoi zouse’n hiche re-unification hi phatah’a tong muolsuo ding in tepna aneiyin ahi. UKLF in nasatah in Naga a ana umsa Anal ho ana boipi zing toh kilhon in Anal tribe ho’n Kuki ahina’u apomdet thei tauve ati’n ahi. Chule Kom tribe in zong Kuki apom tauve zong ati. Nagate’n nasatah’a ana lheplhah uva, ana lailah lud khah’u tribe ho kom’a Kuki ahidan’u gaseidoh ding chu thilbai hipuonte. Hijieh chun UKLF in khatvei thu in amaho kithujo zou puonte, chule NSCN(IM) in phatah’a aumpi zing’u ahijieh in deibang in natoh amachal theipoi zong ati.
Cap. Jacob in SoO toh kisaiya thudoh adawnbutna’a chun KNO le UPF kihoutuoh’a hiche hi lahdoh’a pha ham, ahilou leh chiepi zing ding ham ti seichien ahiding adeidan aseiye. Tudinmun bang’a achielhah leh imacha ahilou ding vang katahsan’e ati changmiel jieng’e.