Nampi hi Bollywood movies ahipoi - The First Word, LD May 2012

Aching-angol, ahao-avai, alien-aneo khenchuom umlou in Kuki chate’n nampi ngailudna thu i-hin hasei lheh tauve. Facebook ahung umdoh hin zong chapangho changei lungthim sung’ah nampi ngailudna thu hatah in muchi bang in ahin tulud piehda’n in akilangtai. Apaodoh chan in ‘hiti leh, khati leh, nampi khangtou inte’ iti zing uvin ahi. Chutileh, chutilou leh nampi hi moh khantou jieng theilou ahida’n athahbeh’a i-geldoh’u angaiye. Nampi khantouna ding chu eima mimal’a kingam ahi suoh keiye. Mi bangkhat chun nampi siemphatna ding in lamkai kihi leh, thaneina eiki peleh, thingnuoi lamkai kihileh, a list kichai theilou in asei uvin, agel’u dinmun chu kituhsah zong leh ima tong doh diehlou maithei’u ahiye. Hin seikit ing’e, nampi khantouna ding chu eima mimal’a kingam ahiye.
Nazou in milhem hih, nakam in zong thu phalou seidoh hih in, jong hih in, tuolthat hih in.... aselam akuon in kikangse in, chuti leh nangma kisiemthah thei pen in nate. Jumun samun’a nampi siemphatna ding thu kisei chu manlou ahibou’e. Hou-inn mun’a kisei zong chu phachuom khellou maithei ahiye. Amichan chieh’a iki thah siem uva, Pathien deilouho i-bawlda’u leh nampi chu achamlou in ana khangtou intin, ana kisiemtub jieng inte. Ajieh chu nampi siemphat ding lunggel neiya nampi ipi ahi helou tamtah aum’e. Nampi chu nang-le-kei ihibou’e ka laijon.
Nang-le-kei kisiempha masa guolou’a nampi joh i-siemphat guot chu huilah’a changvai kithe tobang mai mai ana hikha ding ahiye. Nang-le-kei umlou hilehen nampi chun meaning aneilou ding ahiye. Nampi aumtheina ding’a chu nang-le-kei i-um angaiyin, nampi phatna ding’a chu nang-le-kei i-phat angaiye. Inn-le-lou don manlou hiel’a nampi’a ding’a lhai lele zong chu phachuom behseh ding in tahsan aumpoi. Nampi chu innsung’a kuon’a hung piengdoh ahi’n, i-innsung i-siemphat masat leh nampi zong chu siemphatsa anahi kitding hilou ham? Oleh dih nasah hih’em?
Tao-tao jieng’a toh guotlou chu aphatchuomna aum nadem? Tulai hi computer age ahita’n, fairy tale tobang ahipoi. Guilhung ding’a i-gelho chu i-toh’u angaiye. Tonglou’a thakhat tah’a hung kilangdoh jieng ding kiti chu hindi film a aguollhangpa thakhat tah’a ahung haddohji tobang bep bou hikha ding ahiye.
Chuti ahikhel khel jieh chun, nampi siemphat ding i-ha ngaituo sang uvin ami chan chieh in eima eima chieh kisiempha masajo’u hite. Nampi chu jaddang lah’a galha lou ding ahiye. Jaddang lah’a galha chu nang-le-kei joh ihi’n, jaddangho nuoise’a nampi aumlouna ding in nang-le-kei joh nuoise thei ding in um poite. Jaabawl thei’a i-um nikhuo chu nampi jaabawl achan nikhuo hiding ahiye. Na nampi na ngailud leh na nampi minsietna thei ding in chon hihbeh in. Nampi nang khut’ah akingam’e. Na minsiet sah ding ham, na minphat sah ding ham? Nang mopuoh ahitai!