Eiho kikah'ah - LD May 2012

Oregon gamsung’a um Portland airport a ka lawinu ahung vailhung ding lamtuo ding in kaga chie in, hiche mun’a chun keiya ding in ka hinkhuo khel lamdang thei ding thilsuoh kidang tah khat kamu’n - gelphahlou beh thilsuoh ahiye. Hiche chu ka dinna mun akuon in feet ni khel in gamla puonte.
Mipi tamtah lenna akuon’a hung kumlha holah’a chun ka lawinu ding chu kavele’n, hiche holah’a chun upa khat, bag hin kipuoh khat kei dinna lam juon’a hung khat kamu’e. Kei komtah’a ding aji le achate kom ahung lhun chun amel’ah kipana adimlha jieng’e.
A bag tuol’a akoilhah toh kilhon in achapa (aneopen ding’a ka ginchad kum 6 vel mi hinte) chu akoiyin, anigel lhon in aki ngongkoi lhon in, apa’n abieng achob pieh in, “nang kamu leh kakipah pen’e... kahin ngaiji dan...” ti’n aseiye. Achapa’n zong jahcha thimtah in “Papa... ken zong nang kahin ngaiji’e...” ati.
Chuin apa ahung dingdoh in, a chapa alienjo (kum 9 ahilou leh 10 hinte) chu abieng ameh pieh in, “guollhang mong mong nahitah hila... I love you very much, Zach” ati’n, aki ngongkoi lhon’e.
Hiche phad sung sese’a chun anu’n apom naosen (kum khat valbep inte) chun mitlha lou hiel in apa inn hung lhung chu ave-ve jieng’e. Apa’n achanu chu apom in, anah lhon asutuo’n, homtho tah in anou’e. Abieng achob pieh in, apomchah kheh jieng’e. Chule ajiet le avei lam in alehle’n, adaiyin, naosen zong chu kipahtah in anuiye.
Chomkhat zou in naosen chu a chapa tahpen apomsah in, ajinu chu akoiyin, phad chomkhat sed aki chobtuo lhon’e. Amit lhon akivetuo in, olcha’n “I love you so much!” ati’e. Kipahtah in anuilhon in, akituhtuo lhon in, akilha nuom lhon talou hileh akilawm’e.
A umchan lhon chu kavet leh kalungthim’a nupa kichengthahho ahung kilang’e. Ahinla amani chu achate lhon kavet leh akicheng thah ahilhon ding tahsan aumpoi. Kakom chakhat’a nupa teni leh achate ki lamtuo dan kavetna chun hatah in kalunggel ana lhumlud zou’e. Kahed manlou kah in kakam ahung kikah in, kalei akileh in “Wow! Kum ijad naki chen lhon hitam?” ti thucheng ahung gingdoh’e.
Kum 14 ka umlhon in, nupa kahi lhonna kum 12 ahitai” ahinti’e. Hiche asei sung’a chun kei eive lou in ajinu joh ave’n, mesiu in eihin dawnbut in ahi. “Aleh... na inn nadalhahna sodtam?” ti’n kadong kit’e. Hiche kasei phad chun keilam ahinve’n, ajinu akoiyin, kipahtah in ahung paodoh kit in, “two whole days” ahinti’e.
Ni ni? Akidang tave.... aki lamtuo dan’u chu kavet leh keichun kumkhat vallang beh kimutuo lou’u hitante kana ti ahiye. Hinla ni ni bouseh kikhen anahi laizang uve.
Eiho kikah’ah
Ka laijon, eiho hinkhuo toh hiche thusim’a nasimdoh hi kikhe lheh nasah’em? Ngailudna chu phad achievang in achulsah pouve. Eiho’a la? Kum 14 val kichen ahilhon tahvang in aki chen ni lhon bang in akilungsiet zing lhon nalaiye. Mihiem in i-tih chan i-hin ding i-seithei pouve. Hiche jieh’a chu nisieh hi eiho’a ding’a nikhuo nukhah pen bang in kigel zing thei leh, kingailudna dailha ngai puonte. Nupa hinkhuo’a hin adang dang sang in ki ngailudna apoimopen’e. Tehnung changeiya kingailu zing mi alhom lheh’e. Hiche milhom, avangpha holah’a jao ding in ka laijon nang zong deisah nahiye.