Silchar ah Ngulkhup Lawm alolhing uve

Silchar gamsung’a um Kuki simlai kiloikhom Kuki Students’ Organisation ho lamkaina nuoiya in February nisim 14, 2012 nikhuo chun kichep guolsieh Town Club Ground, Silchar’ah ana mang uve. Silchar gamsung’a Kuki simlai tamtah in KSO min’a hiche kichep guolsieh hi kumsung kisuh halna ding’a ana bawl zing’u ahidan Hemminlal Haokip, Secy. Info & Pub. in Laijon Digest ahin hedsah’e.
Hiche kichep guolsieh’a Special Guest, Kamkhochuon Chongloi in kichiem ding’a chiekhom simlaiho tilkhouna aneitoh kilhon in KSO puonlab kaipalna zong aneiyin ahi. Rev. Mang John Simte in KSO Sports Meet 2012 chu Pathien hieng’ah alhandoh in, mipi’n thanuom tah in kingailudna ana tahlang uve.
KSO Sports Meet 2012 a kichiem ding hochu lawm (group) 4 in akikhen uvin, Khotinthang Lawm, En-jakhup Lawm, Tintong Lawm, Ngulkhup Lawm akisah uve. Numei hileh pasal hileh lungna chimsed’a akichep theina ding uvin volley ball, shot-put, 100m race le adang dang abawl uvin, football vang pasalho bou in apeh uve.
Kichep khumna kin’ah Special Guest Dr. Jangkhomang Guite, Asst. Prof. AUS in simlaiho tilkhouna aneitoh kilhon in puonlab khailhahna aneiyin, kichepna sung’a lolhinna muho khut’ah kipaman hopdohna zong anei pai-pai’e. Lawm li lah’a chun Ngulkhup Lawm chu all-round champion ahitai. Pathien hedpina’a kipan KSO sports meet 2012 chu Pathien kom’a Chongnieng Gangte in kipathu seina amang in sports meet kha ahitai.
KSO sports meet 2012 a lolhin theina ding’a sum-le-pai, tha-le-zung’a KSO ana kithuopiho zouse chung’ah KSO Silchar min in Hemminal Haokip, Secy. Info & Pub. in kipathu ahin seiye.