Barak valley kiti Tuiluongphai hi Assam lhang lam’a um, 6912 sq km a lien, District thum um Cachar, Hailakandi chule Karimganj, mihing 32, 87,676 chenglah’a lac1½ val hi Chorei, Ranglong, Sakachep, Reang, Rupini….. Kuki ahiu ve.
Assam Govt. chiena dungjuiya All Assam Tribal Sangha (AATS) in Tribal ho Tribe Certificate la ding zouse recommend abawl’a ama-ama DC in Counter Sign abawl’a apiehji’u ahi. Hinla vangset umtah in AATS Karimganj District Unit in achung’a kisei Kuki Sub- Tribe ho zouse hi 2009 apat chun ST list’a napang pouve ti’n Tribe Certificate ana khapieh tauve. Hijieh chun Kuki Innpi Barak Valley in DC/SDO chule All Assam Tribal Sangha ho kom’a avel vel’a Tribe Certificate apieh kitna ding uva aki ngeh vang in ape tapouvin, Tribe Certificate mulou in kumthum jen aum tauve. Hijeh chun Tribe Certificate muna thei ahipou leh ti’n Rupini Kuki hole Reang Kuki hon a Kuki hina’u dalha’n namdang Borman le nam dang-dang anabel tauve. Chule Chorei, Ranglong, Sakachep le adang-dangho’n zong a Kuki hina’u dalha’a koi nam belding akihou zing tauvin ahi.
Aban achal’a asiet cheh-cheh louna ding in Kuki Innpi Assam, KSO Assam, KIM le KSO GHQ ho’n eihung vil diuvin ana kikou zing in, hinla ahung thei tahlou phad uvin Dec. 7. 2009 in Kei (Thangjangam Khongsai) lamkaina in Fonidhor Chorei, President Kuki Innpi Barak Valley le alawiho boina thulhut di’n Manipur kajuon uvin KIM, KUMHUR le KSO GHQ lamkaiho cheng toh Pu. Holkhomang Haokip Ex. MP pa inn’a kihouna ana kinei in ahi. Chule Kuki Innpi Assam le KSO Assam toh 29 July 2010 in KCC Assam Synod Office Suongpijang NC Hills’a kihouna ana kinei kit in ahi.
KIM le KUMHUR hedpiehna’n KSO GHQ te’n sum-le-pai in pan nasatah in ahinla uvin Kuki Innpi Barak Valley min in Govt. of Assam Memorandum akipe’n, Kuki Innpi Tribe Certificate Issuing authority Power peuvin ti’a hano’a akino leh May 12 2011 ni’n Govt. of Assam in tu’a pat’a Kuki Innpi in Recommend abawl’a, chuleh DC/SDO (Civil) in Tribe Certificate Issue abawl ding, All Assam Tribal Sangha in Kukiho chung’a Recommendation Power anei tahloudi’n notice asuo dohtai.
Hijeh chun Karimganj DC thupieh in KIA State in Chorei, Ranglong, Sakachep le adang-dang hohi Kuki ahi mong-mongna uve ti’n hedpiehna peuhen, chuleh KI Karimganj District President le Secretary Specimen Signature zong hedpiehna peuhen ati dungjui un Kuki Innpi Assam State in hedpiehna abawl in 18 July apat chun Tribe Certificate aki hompan kittai.
Aki thecheh ding tasa leh amangthah ding tasa Barak Valley a Kuki chate’n kipahtah in a Kuki hina’u min kisut in Tribe certificate akilahkit tauve.
Hiche bawldohna ding’a nasatah’a taona toh thuo’a pan hinla Pu. Manbullal Chorei Working President Kuki Innpi Barak Valley le atohkhompi cheng, Kuki Innpi Karimganj, KI CCpur, KSO CCpur, KIM, KSO GHQ, KUMHUR, Pu Holkhomang Ex. MP, KIA, KSO Assam, KCC Assam Synod ho chung le mimal’a taona toh thuo’a panlaho zouse chung’a kipathu hi che magazine mangcha’n kahin seiye.
Pathenin Kuki Chate vang ei boh jing tau hen!
No comments:
Post a Comment
Note: Only a member of this blog may post a comment.