KMAA in Gold le Bronze jebdoh - LD March

Achiesa February nisim 4 - 7 kikah sung chun Imphal mun’a um Khumanlampak SAI Boxing Arena mun’ah India MuayThai Challenger Cup state 11 akuon’a palai jaona ana um in, hiche’a chun Kuki Martial Arts Association (KMAA) in Gold medal le Bronze medal khat chieh in lolhinna ananei uve. Hiche Challenger Cup hi Federation of Amateur Muaythai of Asia le International Federation of MuayThai Amateur teni hedpiehna nuoiya MuayThai Federation of India in a vailhun ahiye.
Kuki Martial Arts Association akuon’a Gold medal hinmu Helkhothang Touthang in CCpur T. Cananphai khosung’a cheng Hemkholun Touthang chapa ahiye. Amahin 57 kg a gold medal akisan ahi. Chule CCpur L. Semuol’a cheng (L) Lienkholun Lhungdim chapa W. Mangcha Lhungdim in 58 kg category ah bronze amukit’e.
Challenger Cup ahin KMAA President L. Nehkholien Haokip zong judge in ajao in ahi. Amahi MuayThai Technical Seminar ho’a zong ajao zing in, India sung’a cheng Kuki chate ding le Manipur thinglhang mite zouse’a ding’a thil phachuom mutheina ding’a machalna kalbi ahida’n L. Nehkholien Haokip in Laijon Digest ahin hedsah’e.
MuayThai kichep guolsieh hi tu-le-tu dinmun in International Olympic Council in hedpiehna anei hihlaiyin, hizongleh IOC hedpieh ahitheina ding in World MuayThai Council le MuayThai toh kisaiya kiloikhomna adang dangho’n nasatah in pan ala zing uvin ahi.
Tuchung convention achun MuayThai Federation of India in MuayThai kichep hi India Olympic Association (IOA) in zong hedpiehna aneiya, National Games, School Games, chule sports body ho hedpieh ahitheina ding’a ngaituo ding in zong kihoulhahna anei tauve ti’n L. Nehkholien Haokip in aseibe’e.
Kuki Martial Arts Academy gold medal le bronze medal amutoh kilhon in Asian MuayThai Championship le International MuayThai Championship a KMAA in pan alahthei ding ahitai.
KMAA in hichan’a pachanna ahinmu hi Laijon Digest in nasatah in akipapi in, maban’a zong ahung lolhin tou zingdi’u adeisah behseh’e.