Shillong'ah nam guollhang khat i-chaan kit tauve (Laijon Digest August 2010)

July 13, 2010 jaan chun Shillong’a lekha sim Gl. Romeo Chongloi s/o Kamchuon Chongloi chu Melhedlouho’n melsetah in lungsietna le khotuona umlou hiel in ana sadlih jieng uvin ahi. Ipizeh’a koiho’n atha ahi hedchien hihih zong leh Nepali guollhang honkhat khutnung hiding in ginmona lientah aum’e ti’n thulhut akimui. Thulhut chun aseina’ah Romeo le aloiho mi phabep hi restaurant a toukhom ahiuvin, phone a mitoh akihou zeh’a pamlam’a gapoddoh ahi ati. Ginchad umtah akuon’a thulhut kimu chun aseina’ah Romeo poddoh kah’a chu aloiho toh Nepali guollhang aumsa hochu kisulunghang kha uva, alhomzoh zeh uva ajammang’u leh Romeo khuo helou pachun athilo khah hinte akiti.
Romeo Chongloi hi BA 1st year simlai ahi’n, St. Edmunds student ahiye. Amahi KSO Freshers’ Meet 2010 ading’a laamzil ding’a inn akuon’a chiedoh ahi’n, lamkah’a ahinkhuo akichai ding lam gelphah in zong nei ponte. Lungsietna le khotuona beihiel’a khutlha hochung’ah lungdamlou thu sangtah i-phuong uvin, thiemmo i-chan uve. Shillong akuon’a simlai ahinkhuo thagum’a lahpieh’a um athumna chan ahitai. Tu masang chun simlaini Meilhei ho’n eina tha pieh uvin, tu’a hi Nepali hiding’a ginmo ho’n eihin tha pieh kit tauvin ahi. Hiche thuhi mohseh’a kichaisah jieng thei ding ahitapoi. Nampi lamkaiho’n Shillong a KSO ho bouseh nganse lou’a, kilungkhat tah’a pan i-lahkhom lou’u leh aban’a midang khut’a ahinkhuo chanding zong i-um nahlaidi’u tahsan aum’e. Hitobang’a namdang khut’a i-lou uhi athahbeh’a ngaituo’a angahna khat siemdoh tei ding mitin in ngaituo chieh tau hite.