Chavang Ahsi vahkit tading; Lhainei ana dammo vangvei (Laijon Digest August 2010)

Benny Khongsai

Muolleb ding nahitam Chavang Ahsi ti’a laijon tamtah ana lunglen laitah in 1990s laiya kuon’a ana minthang, tu’a zong minthang pen nalai, Khatvei jol’a singer Benny Khongsai in September lha leh audio album thah khat record abawl kitding ahitai. Tulaitah hin Musician Thangjangam Khongsai in music aguontub pan ahitai ti’n thulhut akimui. Benny in aseina’ah tuchung’a hi ama lasah luiho zong ajao sahkit ding ahida’n aseiyin, ipi laa ahiding vang chu ahin release lam tieng leh ol’a i-heddi’u himai inte. Achiesa May lha chun Benny hit song Aw chung toni, alebkuon’a le Lungsietna lien kinepna thon Ginlian Hangzo in phalna lalou Paite pao’ah ana ledoh in, hiche teni vang chu ahin jaosah lou ding ahitai ti’n thulhut chun aseiye. Chung tuoni lebta zong leh Chavang Ahsi hung vahkit ding in aumtai. Chule hiche audio album a release zou leh kicholduo louhiel’a video album kab pai ding zong atikit nalaiye.

Lhainei Haokip

Tu masang zep chun Gospel Singer Lhainei Haokip chu ginchad phahlou hiel in tahsa dammona zeh in KPI Mission Hospital’ah tahsa damlouna zeh in ana um in ahi. LD toh Lhainei kihouna’ah ninga sung tobang doctor ho’n ana vekol uvin, hiche zou chun hospital ana dalhatai. Lhainei in aseina’ah Malaria ahilou leh Typhoid hiding in doctor ho’n aseiye ati. Tulai nisat toh, kicholduo manlou hiel’a laasa’a achiedoh zing hi LD in phad chomcha akicholduo ding adeisah lheh’e. Azehchu Manipur sung bouseh hita zong leh district chuom chuom ahitieng leh khuo umdan ana kibang jitapuon, chule khuolzin miho’n dammona tamtah lah’a Malaria avei nuom diehset zeh in LD Lhainei akicholduo ding adeisah lheh’e. Hinla laijon tamtah in ngailudna jal’a akouna’u ganiel’a nuomtah’a kicholduo ding chu ama’n zong agelthei diehpoi. Ipi hizong leh phad chomcha ana dammo sung in laijon tamtah in ana lunggimpi man in, tu’a damsel’a lasa’a achiedoh le thei kit zeh in Pathien i-thangvah uve. Chule ama’n zong masang’a sang’a anam choihoina ding leh Pathien avahchoina’a hatah’a pan ahin lahkit ding ikineppi uve. Dammo kit tahlouna ding’a neh le chah akitim thiem vang ngai pen ding in asei uve. Hahsa lheh zong leh kitim di himai na Nei..??