Kuki Atristes to rock Shillong (Laijon Digest August 2010)

Shillong Kuki simlaiho’a ding in tukum hi vangsiet kum tithei hielkhop in ana umtai. 2009 Academic session akuon tuni changeiyin simlai manlutah mithum, Paosat Kipgen, Secy. Social & Culture (KSO-S), Paolien Chongloi, Asst. Secy. Games & Sports (KSO-S) chule Romeo Chongloi, amaho cheng hi hunam in ahinna’u lahpieh in ana um tauvin ahi. Hichangeiya Shillong khopi sung’a i-cha le nao teuvin lunghemna le puldouna’a hinkhuo aman lai uvin tuhin kumsieh’a abawl ngai bang uvin 2010 ading in Freshers’ Meet man phad ahung lhung kitta’n, mitlhi tui tamtah aluon ding tahsan aum da’n Mr. Ginminthang Lhungdim, Gen. Secy. KSO-S akuon in thulhut akimu’n ahi. Lunghem pum’a kipa guolnop bawl ding chu thil hahsa tah hizongleh ahilou theilou ahitah zeh in alung liengvai lheh tauve. Hiche zeh tah chun alunghemna’u henem ding in innlam ahin bel uvin, innmun akuon in lasathiem mithum Kakai Kipgen (2008 LD Best Pop Singer), Lienchung Haokip (Kuki Idol 2008-09) chule Miranda Singson ho solpieh’a aumna ding uvin Kuki Artistes’ Progressive Union hieng’ah thumna ahin nei uvin ahi. KAPU in phatah’a akigel nung in tuchung’a chieding artistes thum hohi KSO-Shillong kithuopina ding’a solding in aki phatsahtai. Hiche hi KAPU Organiser pu akuon’a thulhut kimu ahiye. Mundang dang’ah KAPU artistes ho’a ding in programme khat’a jaoman ti ana um in, tuchung’a vang hi KAPU in imacha angehlou ding ahiye.
Thulhut chuom kimu khat chun aseina’ah Kakai Kipgen in tu’a a record thah lieh thangvan’a kiti audio album hi Shillong KSO Freshers’ Meet August 6 nikhuo leh release na ahin neipai ngal ding ahiye. Hiche album ahin Kakai Kipgen in Amar Thomsong lasah Lunghel puldouna vang hi anai guol tilaa chu athah asahkit in, chule ama hit song Jaanlai Lengnu Joe Khongsai toh athahbeh in remix abawl lhon’e.
Chule Lienchung Haokip in Shillong azot masang’a ama video album masapen ding August nisim 2 nileh B. Vengnuoml’a a release ding ahiye.
Miranda zong hin 2009 Best Actor Sharon Minthang toh chuohthet in audio album khat ana bawlkhom kit lhon in ahi. Hiche zong hi tulha sung’a release hung hiding ahitai.
Ahung kinungle lam tieng’u leh Shillong’a um Kuki simlai zouse kipana ahin dalhah piehdi’u ikineppi uve.