Pupa gam lhasuo poute - Chingthiempa (Laijon Digest August 2010)

Phaigam Meilheiho’a, Thinglhang gam eiho’a kiti chu thudih ahi’n, hizong leh meilhei atam’e... eh atam’e kiti bang’a ahung puntul tul tahzeh uvin achenna’u phaigam in adollou tobang’uh ahitai. Hiti ahizeh chun eh bang’a tam meilheite’n i-gam’uh eihin duchad pieh tauvin, Phaigam toh kinaiya um eimi khuo tamtah amaho gam suosah ding lunggel anei uvin, hiche chu thildih loubeh abawl’uh ahitai.
Ahinla, meilheite’n ipi atileh thil dihlou chu henasasa’a abawl’uh ahidem? Meilheite hi miching atam uvin, thilkhat abawl’u leh azeh umtei ding in ginchad ahiye. Azehchu ipi ahidem? Meilheite kidong henlang, ipizeh pentah’a chu kagam’u neihin chu jieng’u hitam? ti’n kidong leh amaho’n ahin seiding uva ginchad umpen chu nangho gam ahipoi, nangho gam ahileh ipitidan’a khominho keiho pao’a kisiemham titei uvinte. Phatah’a i-gelleh hiche hi thudih ahung hikittai. Eiho gam chu ipiding pentah’a meilhei pao i-man uva khomin inasiem’uh ahidem? Pao neiloute ihi’u ham? Eipao um ngal’a ipiding pentah’a chu meilheite pao inaman khel khel’uh ahidem? Kenvang Imphal sung’a meilheiho houpi ding tilou in meilhei pao manding kanuompoi. Chule Hindi le English zong kamang nuompoi. Pao kaneiyin, kapao chu kakitho lou leh kon eitho pieh ding ham? I-chenna’u thinglhang gam, eiho gamsung’a i-pao’uh atho nuomlou’uh ahipuon, eiho zoh in amaho pao kithiemsah tah’a i-manji zeh uva eiho pao anuoise’u ahitai. Kol hileh meilhei hileh i-gamsung uva chengho chun i-pao’uh athodi’u angaiye. I-gamsung uva paodang akimanlaise’n minuoiya umzing kahi ti kihed ute.
Amaho gam toh kimat’a um eiho gam, ahivang’a amaho pao’a khomin kisiemho chacha hi ahin duchad dan uvin aumtai. Tuchung COPTAM kiphinna’a S/Hills a mivo chu amaho ahiuvin, CCpur a CDSU lamkaiho mavo zong amaho ahiuve. Amaho gam ahilou vang’a chu eihin chu tahphad uva kilungkhat tah’a pangkhom jieng ahiuve. Nang RK te, nang Bamonte akiti pouve (aphung minho’u zong kahedieh hih’e). Eiho’n zong hiti’a chu pan i-lah’uh angaiye. CDSU President Lalkhohao Chongloi chung’a khut alha’u chu i-lamkai khat’uh eihin nuoise pieh’uh ahipuon, imacha’a eimulou ‘uh tiding ahiye.
Tu’n zong phad aum nalaiye. Paodang dang’a kisiem khomin hohi eiho pao’a iki kheldoh lou’u leh tu’n COPTAM hapanna jal in chudoh zongle’u hen nikhuo khat leh eihin chukitdi’u, hiche tieng chuleh COPTAM ana um nalai nadem? Iki siemphat lou’u leh COPTAM kah’a zong phung le chaang’a ina kikhen mankitdi’u ahi nalaiye. Hiche masang chun, khaiye, gam le nam’a ding in lunggel nei’u hitin, i-pao’uh ngailu utin, jachadpi lou in domsangjo’u hite. My language is my identity akiti’e.