Nunlui aw nunlui

Nungah guollhang’a ding’a lungchang puohkehna thei hielkhop’a thuoh hahsa chu nunlui nei hiding in tahsan aum’e. Phad sodtah hung kingai nung’a ipi hamkhat zeh’a ikikhen khah leh iki ngaipi nu/pa chu nunlui tiding ahi maiye. Ahahsat behseh zeh’a chu eimi laa ho’a pahbang chuldi’a ka phallou kiti thucheng tam diehset hichu’o. Pahbang chuldi’a kiphal lou teni ahung kikhen lhon le vang, pahbang’a pahkhom kit ding lunggel ngaituona vang chu umtei vehta na?
Kikhen nung’a na nunlui lhangai zing nalaiya, pahbang’a pahkhom kit ding lunggel neizing nahileh hiche article hi mi zouse lah’a nang’a ding aha hidiehset’e. Phatah in sim le chun hoilai hamkhat beh chu na naphatchuompi tei ding zong tahsan aum’e.
Na nunlui kom’a kithah ngai kit hite gati jieng chu thil phachuom behseh hilou hiel ding ahiye. Vannuoi leisiet ahin lampi tamtah aum in, hinla lampi zouse azotna akibang puon ahi. Imphal akuon’a Moreh chieding’a kiguonu chun Sadar Hills lampi juon tei tei leh itih leh agalhung mong nadem? Lhunglou hiel ding hichu’o na? Moreh i-chie nuom leh Moreh lampi’a i-chielou leh itih laiya bah kilhung ding? Hiche tobang’a chu na nunlui toh pahbang’a pahkhom kit ding lunggel nei nahi leh alampi dih naho angaiye. Hiche lampi dih chu Love Guru in nahin komu guot ahizeh in thildang ngaituo lou in nahin thuhilna hi phatah in ana sim’o.
Na nunlui in nahin dei nahlai mong ding hinam? Hiche thudohna hi na dawnbut thei masatpen angaiye. Imphal akuon’a CCpur juon ding in Keishampat ahopa tei angai tobang’a chu hiche thudohna dawnbutna um masalou hiel’a chu na nunlui lungthim nanungluo zoulou hiel ding ahiye. Khatna’ah: hieng’e, eihin lhangai zing nalaiye. Nina’ah: Eihin lhangai tapoi. Thumna’ah: Kahe thiem theipoi.
Eihin lhangai zing nalaiye
Nahin lhangai zing nahlai ahileh seibe ding dang aum dieh tapoi, chien lang lungsietna khaogui atansa chu gazop thah kit jieng ta’n. Atansa kizop chu vetding in hoi hih zong leh lhou nante.
Eihin lhangai tapoi
Nahin lhangai tahlou ahileh maban ding chu nang khut’a kingam ahitai. Nahin lhangai lou khat kilhangai sah kit tei ding nati’em? Chuti ahi le vang, seibe ding adang imacha aumpoi efforts must be double ahijieng’e. Phad gomkuom namu zouse’a alung nahol’a, nahin lhangai kit teina ding’a pan nalah ding ahi maiye. Numei ho’a ding in vang hiche hi hahsa zep inte. Hinla numei in nunlui kilungsiet sah kitna ding chance pasal sang in ahaojo’e. Kilungsiet hinkho mansung’a lunggel le thanopna ho atamjo ki kihetuo chieh ahita’n, hizeh’a chun khat lung i-hol leh alunglhaina ding bangtah’a hinkhuo man ding chu Love Guru in aha sei thupi pen ahizing in ahi. Kilungsiet kitna ding’a kilungsietna topic puohdoh chu thilpha hipuonte. Phad vang lud zep inte, nikhuo, hapta, lha chule kum changei zong ludthei ahiye. Mi lungnieng’a gunchu chun alungtup amuolsuo ding ahiye.
Ka hethiem theipoi
Na nunlui in nahin lhangai le lhangai lou hedoh thei talou nahi le vang, nalhuoh nakichep sah angaitai. Na nunlui in tulai sms forward kibawlho khatbeh nahin forward khah’em? Miss call nahin pieh khah’em? Ahilou leh phone nahin bawl’a thuchuom chuom’a hung houlim ji’em? Chuti ahile vang, lampi adih lheh jieng’e. Khanglaiho kisuhtuona lah’a nang muna ding’a alawiho toh hung umji’em? Hiche hochun na nunlui in nahin lhangai nalaiye ti avetsah ahiye.
Nangni bouseh naki houlim lhon tieng leh koitoh naki ngaitah’em? ti thucheng nahin doh’a nang in khuchepa/nu, ahilou leh koimatoh ti’a na dawnbut leh ama melsuo chule ahailahdan chu hung kibanglou ding ahiye. Nang nahin lhangai zing nalai ahi’a, midang khat in nahin hel ahilou leh midang khat nahelguot thu nahedsah tieng leh na nunlui chu mitmu jieng ding in kikhel jieng hih zong leh aninglam hoilam khat beh chun nopmo sahna melput ahin neidoh jieng ding ahiye. Hinla koima toh kilungsiet ding ngaituo lou nahi le vang ahinkhuo mandan chu nuom chuom lheh inte. Hiche akuon’a zong chun nunlui toh kilungsiet kitna ding lampi aum le umlou phatah’a naheddoh thei thou ding ahiye.
Phad chiesa thuho naseikhom jilhon’em? Masanglai ti sang’a iki lungsiet laiya.... ti kampao ahung gindoh pou pou leh kilungsiet kitna ding in kot lientah na nunlui in ahong’e ti naheddoh jieng ding ahiye. Iki lungsiet laiya... kiti thucheng chun kilungsiet kit ding nuom nalai ahidan atahlang ahitai. Nang zong chuti ma’a pahbang’a pahkhom kit ding nuom nahi leh ipi nanga nahlai ham? Tu zong chun phon bawl in lang, na suhkhiel ho ngaidam thum in lang, pahbang pahkhom kit taite ti tang’em?
Achung’a iseisa ho’u zouse akuon’a zong na nunluiyin nahin lhangai le ngailou hedoh thei loulai nahi leh achaina keiding in point khat seibe’u hite. Hiche hi tulai pao’a seiding hileh a risky lheh’e. Hizong leh hiche akuon’a hi nunlui ho lunggel kihedoh thei ahiye. Nahin lungsiet zing nahlaiya ahileh midang toh naki show off leh engse jieng ding ahiye. Hiche chu patep ute na? Ahinla nabawl khiel leh ama’n zong nang muding’a nungah/guollhang dang toh vethah tah tah umchan’a nahin lekab khah ding tijad aum lheh’e. Hinla mangang tah’a na chaloh leh hiche chu hung suohdoh man puonte. Na lawi khat le ni toh hiti’a chu na nunlui masang’a ako behseh hilou’a naga kivop khah leh naheddoh jieng thei ding ahiye. Hiche tieng chule na hisab’a green light mu’a nakigel leh bothut policy manchah pai jieng thei hiding ahitai.