Kumli tah hita

Phad le nikhuo chie zing toh kilhon in hedman lou kah in Laijon Digest kumli ana lhing manta’n ahi. Thakhat tah’a LD kumli lhing jieng thei anahi le vang, phad chiesa ho’a gentheina le kipana ana kituoh ho zouse hedkhah lou thilsuoh ana hijieng di’u dan ahitai. Hinla, kumkhat, kumni... ti’a banneicha’a hung kalsuong ahizeh hin lung’a hung kilang zing ding thil tamtah LD in ahin kimaituopi ta’n ahi. Lunglhahdai nikhuo’a thahad eipe’a, kipa nikhuo’a thanopna eina piehbe laijon ho zouse tuni nikhuo hin LD ading in mi mantam nahi chieh uve. Gentheina le kipana i-tuo tou uva, kumli lhinna changei eihin puilhung’uh chung Pathien thangvah lou in umdahen. A minthieng i-choi’an uve.
LD kumli alhin nikhuo hin gentheina le lhasietna thuho minphah in umdahen. I-kipana’u le iki tosot tuona’u zoh hatah in i-tahlang uve. Gentheina le lhasietna hinkhuo jiengseh kituoh hitaleh kumli changei i-hing zou mong nadiuvem? Kahlah’a gentheina le lhasietna hochu eiho’a ding’a thahadna ahijo’n, hizeh chun kipana i-tuo tieng’u leh ikipana’u achungnung diehsetji’e. Tuni nikhuo zong hin LD kipana asang lheh jieng’e. Kumli sung ving veng lekhabu juohna mun ho’a khaidoh’a aum tieng leh laijon ho mit le lungthim’a kipana apieh zing chun LD asuhad cheh’e. Hizeh chun LD akhangtou poi iti thei pouve. Ikipattil uva LD copy jad toh tuni kumli alhin nikhuo’a a copy jad zong tethei ahi tapoi. Hiche hin LD hin a laijon ho lungthim sung’ah mun lientah aneiye ti photchet in aum’e. Ahoipen ahi ti’a laijon ho’n achoh zing’uh hiding in vang tahsan aum dieh poi. LD sang’a hoijo le phajo magazine dang eipao’a kisuodoh umlou ahipoi. Aum’e. Keizong kanuom’e. Hizong leh ahoimo pen zong vang ahidieh poi. Ahoipen le ahoimo pen hihih zong leh ngailudna jal’a i-choh zing’u hi LD ading’a kipana sangpen ahitai. Laijon ho’n LD angailud bang’a LD in zong a laijon ho angailud diehset ahiye. LD i-sim uva kuon in khantouna thei ding thu le laa zilna neilou editorial family ho’n hih sundoh hihbeh zong le’u ngailudna jal’a iki tosot tuona’u chun i-nampi’u step khat’a akhantousah chuom ahi ti heddoh theiyin aum in, kipa diehsetna lungthim sung’ah aum’e. Kumli sung LD na na ngailudna ban’a maban’a zong ana ngailu zing nalai ding in tepna chungnung pen in kahin tiem uve. Let us keep the candle burning.