Na lungsiet tah tah le suhbuoida'n - LD October 2011

Laijonpa, nungah melhoitah. chonnemtah chule nalunglai zouse luodim zing nungahnu chu namu tieng leh itobang lunggel naneiji’em? Amin nahed hinam? A phone number la? Koi khuo ahi nahed’a chu nalunglhai sel jieng’em? Nalungthim’a amanu ahung kilahdoh cheng’a sms thot tei ding lung nagel zing’em? Oleh na nathot man kit hitam? Tahmel’a ga houpi ding la tijadna’a nanei zing nahlai ham le? Ahilou leh lawi le guol’a nakivoppi theiya, lungsietna thimthu lel ding bouseh kivad’a hitam? Ihmumo jen le toumo jen’a nalungsietnu chun nang nahin lungsiet hinam? Akhoh tangeiye, i-lungsiet mama jieng nu’n koi ihi zong ana hedphah lou ding chu. I-lungsiet mama jieng nu’n nitin le phadtin’a ikivop zing vang’a i-lungsietna ana heddoh theilou zong chu akhoh kit tave. Ipiba i-lodi?
Nungah akiti leh guollhang in agahel tei ding angaiye. Nungahho’n guollhang adeichad tahkhat aheltheina ding uvin Love Guru in phalna ana petai. Ahijieng vang in nungah zouse’a ding in hiche chu thil hahsa anahiji’n, eiho society in aha pomthei loulai jieh in mi zouse’n abawlthei hihlai uve. Nungah hothu chu chomcha ana kichuomkoi tadi phot leh.... guollhang hija nungah helje helou hochu akinaipi pen pen hospital’a vetsah loiding tithu zong khatvei sang’a tamjo ina seidoh kha tauve. Velsei angai tapoi. Guollhang nahileh nungah kiti chu nang helding’a guotsa ahi ti nageldoh zing angaiye. Ahinla nungah khat aneizou nung’a nungah dang gamoh helhel jiengho Love Guru in daanpo in akoi nuom’e. Nungah khat chu guollhang khat’a ding ahi ti geldoh zing’u hite.
Hatah’a nalungsiet nungahnu chu nagahel’a, ama’n kilungsietpi dang kaneitai ti’a nahin dawnbut leh khongai phot in, ama hinkhuo chu ama’a ahi’n, nang in thu naneikhum jieng leh dihthei puonte. Nungah chu helding mong ahinai, hinla kilungsietpi neisa ahileh suhbuoi lou in aphai. Numei chu nungah ahilaise’a anei umlou ahinai, hinla aneiding’a kiguong mi um ahitah jieh in suhbuoi lou in angaiye. Mi konkhat in vacha lenglai chu akab lha masasa’a ahi atiuve. Vacha lenglai kablha masasa chu anei hikhat nante, hinla nungah hohi vacha ahipouve ti geldoh zing’u hite. Example dan’a vacha toh nungah i-tekah mongdi’u ahitah zong leh hiti lampang hin gah vekit’u hite. Mi thang’a oh sa vacha chu nang in gakilah jieng le chun aneipa’n ipi ageldem? Nang vang kipah nan nate, hizong leh nang thangkam’a ohsa vacha chu mi’n ana kilah leh ipi nageldem ti zong nagel angaiye. Chule nungahho zong hinna nei, lhagao nei ahiuvin, deichad jieh’a lungsietna chu thuchuom ahita’n, mihiem ahina’u hi jabawl angaiye. Anoplou sasa’a nopsah guot ham ham lou in zong aphai. Vo guollhang, nungah khat in hatah’a nahin deichad, nang in nadeilounu chu namu zong leh naluohsuoh jieng hina lou ham? Hiche tobang chu hichu kati... ka laijon.. nungahnu’n nahin deilou’a ahileh nahin deimo ding dan chu gel in lang, jachadna’n neiyin. Hiche kiseilona chu mikhat hunam ham, ahilou leh namphu’a eima’n i-deichad val behseh jieh leh i-lungsiet val behseh jieh’a nopsah guot ham ham lou ding tina’a i-sei’u ahi’n, kisuosalna vang ahipoi.
Nungahnu hatah’a nalungsiet ahichu akichieh in, mikhat nalungsiet thei chu na bulhinna ahiye. Mi lungsietna neitheilou hovang mi vangse chungnung ahiuve. Hatah’a na lungsietnu’n nang nahin lungsiet theilou chu akhohpen tahkhat ahung kisuohdoh kittai. Nahin lungsiet theilou vang in nang in nalungsiet mama jieng’e. Nalungsietna naha vetsah’a, natam phuondoh chan in nahin lungsietmo chehcheh’e ti’ute. Hiche dinmun’a dingkha laijon holah’a guollhang ijad i-um tadiuvem? Lungsietna i-pieh’u chu abulhinglou hintem? Janglal Khongsai in asah ding lunglen laa khat i-moh siem ding hitam? Oleh Kamboi Baite joh in saleh ipi atidem? Phatah in gel’o laijonpa... mikhat i-lungsiet tah tah leh agenthei ding zong aki phalpoi. Hahsatah’a na lungsietnu’n hinkhuo aman zing chu pha nasah ding hinam? Nang in hatah’a nalungsiet vang in ama’n nang nahin lungsiet puon, hijieh chun nang in amanu kom’a lungsietna thimthu nagaha lel chan in ahinkhuo agentheiyin, aning kihel in, hinkhuo hahsa asalheh jieng’e. Nalungsiet tahbeh’a ahileh hichan’a agentheina chu naheddoh tei ding katahsan’e. Hijieh chun hiti hin bawl in, nalungsietna asandan navetsah theina ding in lha-ongta’n. Akom’ah lungsietna thimthu analel tahih in. Kahin lungsiet behseh jieh in na genthei ding kaphalpoi, hijieh chun nakom’ah ka lungsietna thimthu lel tapuong’e tijieng in. Hiche nakamcheng chu ajahdoh nikhuo leh kipah lheh inte. Chuche zou akuon chun nang in zong naseibang in lungsietna thimthu lel tahih in. Hinla phad lemchang namu chan in kamphatah in houpi zingjo’n. Lungsiet tei tei ding’a lhing ahi nah leh nathusei le na umchan chu nang nahin mucheng in alungthim sung’ah ging zing tante. Dongma aneijieh ham’a nang nahin dalbawl ahitah zong leh oltah in a dongmapa toh kikhen’a nanglam ngat ding dan alung’a ahin geltei ding ahiye. Ngahhad in, lungnieng in kiti hinalou ham? Bothut policy manchah pai jieng hin mihiem hinkhuo hatah in asuse theiye. Nang hinkhuo zong asuhsiet louna ding in chingtheiyin.
Nungah hohi aphat’a pha, akhoh’a khoh ahiuve. Akipa ped uva anui siuseu jieh uva khu moh nuoise jieng thei hilou hiel ahiuve. Ahung lunghan vanglah uleh hoiya um ahi’u zong kiheddoh theilou hielkhop in alunghang jieng thei uve. Hijieh tah’a zong chu moh nuoise lou ding ahiuve. Tha lam akiti leh itiba pasal sang’a moh hadjoh sam diehdi’u ham, ahinla tha sang in lungchang aneihoijo uvin, suh lunghang khah ding tijad aum uve. Nungah khat nahel’a kamdam hieucha’a kilungsietpi kaneitai, ahilou leh lawi le guol in kivopjo hite ti’a apanchah kheh’u leh athu thu uvin ana nung jieng phot in. Nang in hinkhuo’a ding’a kilungsietpi ding bouseh hilou’a chenkhompi ding changeiya navet ahi tahbeh nah’a ahileh ana ngah had tadi’n. Hunam’a nano leh nano mang pai jieng ding ahibou’e.
Ahoijoh chu hita zong leh guollhang khat toh kilungsietsa nungahnu chun a guollhangpa chu hatah’a alungsiet pou’a ahileh amani kikah’a guollhang dang aga kijelud khel khel ngaiyin Love Guru in agelpoi. Nungahnu toh kilungsiet guollhangpa’a ding’a ama chalohna suhbuoiya aum zing chu hedthiem hung hahsa lheh inte. Na neisa khat midang in keiya ahi ti’n nahung chu zing leh ipi nageldem? Akicheng ahilhon jieng loulai vang in kichen ding lunggel hitei lhon inte. Akichen lhon le kichen lhonlou chu eiho gaha boipi ding zong ahi dieh tapuon, akilungsiet sung uva chu phad-ong pieh angaiye. Eichung’a zong hung lhung jieng thei thil ahijieh in chihthei angaiye.
Mi nungah nagachu zing bang’a chu nang nungah zong mi’n nahung chupieh thei ahiye.
I-seisa bang uvin nalungsiet tahbeh’a ahileh nungahnu chu na suhbuoi lou mai angaiye. Hizongleh na umchan, amanu’a ding’a napumpi’a nakipieh zoudan chu ahin mudoh thei tieng leh aguollhangpa toh nang chu nahin lebtuo intin, nanglam agihzoh nahleh hung onlhu thou thou ding ahiye. Phad ludzep inte tithu ahi’n, onlhu thou thou nante.
Kilungsietna kitihi khat hapan vang’a mini chung’a moh guilhun jieng thei thil ahipoi. Lungthim ni in kigellhuhna phatah ahin neithei tieng le bou ahung guilhung thei bep’e. Nungah le guollhang kikah’a kilungsietna zong chu chutima ahiye. Anigel lhon’a akigellhuh lhon lou leh lungsietna piengdoh thei puonte. Hiche apiendoh theina ding’a chun lungthim thiemtah’a lungthim khat pen chu thujo angaibou’e. Khuttum jiel’a nungahnu guollhangpa gavoh tiho vel chu dinasaur khanglaiya ana kichaisa ahitai. Tulaiya ding in vang lungthim thep bou angaichaitai.