New Delhi i-minsietna mun’u hizing ding hitam? - LD June 2011

New Delhi tuolpi’a um eimi nungahho thusim ina jadoh zing uvin ahi. Lolhinna sangtah tah hinmuho thusim zong ina jajiuvin, vangsietna sangtah tah hintuohho thusim zong ina jadoh jiuve. Mihiem ihizeh uvin mi zouse’n thusim chuom chieh i-nei uvin ahi. Koima zouse thusim akibang suohkei theipoi. Lolhinna tuohho ikipapi uvin, vangsietna tuohho i-lhasietpi uve. Hiche ahung umdoh theina chu koimacha amachang’a hingthei i-umlou zeh’uh ahipen’e. Laijon khat ihizeh uvin lolhinna le vangsietna chung’ah lunggel puohdan iki hedthiem pieh tuo jiuve.
Eiho’a ding in gampam tamtah aum’e. Ahinla gampam tamtah lah’ah New Delhi ahin eimite i-tampen uvin ahi. Atampen ihi’u toh kilhon in newspaper le magazine ho’ah i-thusim’u ahung kisuodoh zing in ahi. I-seisa ma bang uvin vangsietna hileh vangphatna hileh ahung kisuodoh dungjuiyin athuoh ding dan koima seilou in lungthim in ahin phuongdoh jiengji’n ahi. Innlam’ah thuthang tamtah akija zing in, hiche thuthang hozong hi atamjo New Delhi akuon thuthang ana hikitji’e. Azehchu i-tamna pen’u ahizeh in thuthang zong atamna pen ahiding hedsa ahikit’e.
Tuchung in zong New Delhi akuon in thuthang khat ahung umdoh kittai. Cecilia Chong kithana thusim hepha zouse’n alaidip akidop suoh keidi’u tahsan ahiye. KSO (D) Press Release kamudoh chun keima tah zong katimul akithoudoh jieng’e. Ajing jingkah in local paper ho’ah athu ahung kisuodoh kit in, jachad le puohnat umlheh zong leh thusuo ahizeh chun ahung kisuodoh ding mong ahi’n, ipi ilodi’u hitam? Akichai chu akichai ahi maitai.
Cecilia Chong hi 2005 kum chun Churachandpur a um Kam (name changed) toh ana kicheng in, maban ding gelkhohna jal in New Delhi ana juonlhon in ahi. Hinla New Delhi ana zot lhon chu amani’a ding in kikhenna zoh ahung suohdoh tai. 2010 kum in ana kikhen lhon in, hiche akuon chun Cecilia in Nigeria mi Innocent Nwayo toh kilungsietna hinkhuo ana mang khom lhontai. Kichenna chet aumlou vang in Uttam Nagar Phase II ah innkhat aluokhom lhon’e akiti. Inn neipa Gurdev Singh in inn bahara lahnuom in a inn luona lhon chu agaveji’n, hinla koima ana um jilou zeh in ana kinungle kitji’n ahi. Innvel’a umho’n aseina uva inn-neipa’n ni 12 zou sieh leh inn bahara ahung dongji atiuve. May nisim 20 ni, nilhah lam nidan 4:00 don in Gurdev Singh inn bahara dong ding in achiekit in, nidang’a banglou tah in Innocent le Chong room akuon chun thil namse tah khat aja’n, alungdon man in Police ho ahedsahta’n ahi. Police ho’n kot akhen hong uvin ahileh innsung’a chun bag sung’ah Chong luong damsa chu ahin mudoh tauve.
Gurdev Singh seidan in Innocent le Chong in first floor aluo lhon ahi’n, Nigeria mi mama Michael kiti khat in third floor aluo’e ati. Puon’a kiveimi dan in akisei lhon’e zong ati. Hinla police ho akuon’a thulhut kimu chun aseina’ah innsung’a chun puon’a kiveiho von ding mong mong imacha aumpoi atiuve. Hiche thu ahin police ho’n FIR khat register abawl uvin ahi.
Ajing in Delhi thusuo ho’n Nepali nungah khat athisa’n akimudoh’e ti’n ahin suodoh kit uvin ahi. Ahinla Chong lawiho voter ID card khat mudoh in aum in, hiche akuon chun athi chu Nepali hilou in Chong ahida’n heddoh ahung hibep’e. Eimi nungah khat athi’e ti heddoh ahitoh kilhon in KSO (D) in nasatah in pan ahin lapai uvin, Chong luong damsa chu Dwarka Christian Cemetry ah Zomi Christian Fellowship (ZCF) Pastor TK Lian in vuidohna aneiye.
Alangkhat’ah Chong lawipa Innocent chu holmo in aum in, hiche thu kisut changei ahin mudoh ahi hih laiye. Innocent hin ningkum October lha’a chu India ahin zotlud ahi’n, Mumbai akuon’a New Delhi ahin zotkit ahiye. Tu’a a inn luona Uttam Nagar Phase II a hi tukum February nisim 4 akuon’a umpan bep ahiye. Police in Innocent chaloh dan Nigerian Embassy hedsahna anei in, chule Nigeria mi phabep zong thudohna anei tauvin ahi. Innocent toh kithuo hiding’a ginmo mikhat police ho’n aman uvin, thudoh ding in ahen uve. Ginchad umtah akuon’a thulhut kimu khat in aseina’h Innocent hi a visa kichai ahita’n, India a aum nahlai ding tahsan aum tapoi ati.
Thudang kija khat chun aseina’ah Innocent inn luona building ahin nungahho ahung vahlud zing uve ati’n ahi. Hiche nungah hochu party bawl ding’a kivon ahizing uvin, ahung valud phad’u zong jaan khang nung jiengseh ahiji’e akiti. Khatvei zong hiche nungah hochu khaam in aum uvin, thudoh ahina uva chun simlai jiengseh dan in akisei uvin ahi. Mivom guollhang hotoh kivop zing chu Chong bouseh hilou’a, nungah dang zong phabep um nalai hiding ham ti ginmo aum’e.
Thusuo jad jad, achuom chuom hung suoh zong leh eimi numei khat athisa’a bag sung’a kimudoh kiti jieng vang hi thil gimnei tah khat ahitai. Chule hiche thusuo kisut changeiyin Chong hi koicha koinao ahi heddoh ahi hih laiye. Police akuon’a thulhut kimu khat chun aseina’ah  a innsung mite’n case ahung bawl uva ahileh hiche thu hi thah boipi hiding ahi ati.
Gampam’ah mi tamtah i-umdoh tauvin, hinla akhoma ma jieng khat chu i-umna mun’a imi isa koima’n eina hedkhah lou ding hi thil tijad umtah ahiye. Eimi simlai le natong, gampam’a aumna mun zouse’ah KSO le KWS aum suoh keiyin ahi. Nu le pate’n zong cha le nao gampam’a i-koidoh ho’u hin KSO le KWS a khohgel nah uvam ti phatah’a khuol chil ding in deisah ahiye. Gampam’a um hingal’a, ami asa kibahpi alaijonho’n aumlam zong ana hedlou, chule a umna mun zong kihedoh lou mi phabep aum’e ti’n ginchad umtah akuon in thulhut akimui. Mihiem koima i-chang’a phathei aki umpuon, i-boina, i-lungdonna le i-kipa nikhuo’a eihin kithuopi ding imi isa kibahpi hotoh kihedtuo tei tei ding hi gampam’a umho’a ding’a thil poimotah ahi’n ahi.
Tuchung’a Chong in ahinkhuo achanna chung’ah lunglhai louna thuphuon internet ah tamtah mudoh theiyin aum’e. Facebook ah pasal khat in Saipikhup toh nungah melsetah’a kithana lim internet akuon’a kiladoh chu Chong kithana lim dan’a siemthu in abawl in ahi. Ahinla hiche lim siemthu chu ipizeh’a nampuon toh akoitha ahi hilchetna peding’a facebook user khat in thupieh anei phad in ana ladohtai tithu zong akijai. Khat vangsietna chu khat in kichepna’a ana bawl lunghanpi zong tamtah aum’e. Chong hin ahinkhuo mantamtah ajad le nampi chanpiho’n kihilna’a aneitheina ding uvin ana lhasuo dan’a i-gel ding uvin deisah ahiye.
Gampam’a um numeiho thu kithang kijadoh aum zing jieng in ahi. Khat le ni mitmona zeh in gampam, adieh’a New Delhi mun’a um i-chanute’u zouse minse dan in aumdohta’n, akhoh behseh’e. Gampam’a um numei zouse akibang ding’a gel’a, moh thed jieng zong mitamtah aumtai. Agelkhiel lheh uve. Som gieh khat in azun ache leh somgieh zouse zunche akiti’e. Hinla ana hidieh jipuon ahi. Khat le ni mitmo zeh’a adang zouse’n zong minsietna atuo thei ahiye. Nungah khat mitmo zeh’a nam pumpi in minsietna amuthei ahi ti geldoh zing ding angaikhoh lheh jieng in ahi. Nopsahna ding ahilou leh sum bai muna ding gelna zeh’a kilhathangna chun kum tamtah hung kisiemtou tou nampi min chu imacha lou thet’a asuh lhah jieng thei ahiye. Delhi Police officer khat in aseina’ah North East numeiho zeh in ka natoh’u ahahsa lheh jieng’e ati’n ahi.
Innmun’a um nu le pate’n zong gampam’a um i-chate uvin itobang hinkhuo aman’u hinam ti khuol jiji ding deisah ahi. KSO ho aumnai moh tijieng thei ahipoi. Nangailud tah nacha chu ajad le nam mite’a ding’a jachadna hung kuondohna pen ana hikha thei ahiye. Hizeh chun gampam’a um i-chate uvin KSO le KWS agelkhoh nah uvem ti heddoh teiyin aphai. KSO le KWS toh kigamla chapang chu ahinkhuo zong i-chan hamkhat achavaisa ahitai kiti leh seival hipuonte. Nam minphatna susetu’a i-cha le nao ahung pankhah ding tijadna’n nei’u hitin, a hinkhuo mandan’u vetlhah pieh zing le’u hen eiho ding’a zong i-sum senlo umna anahijo ding ahiye.