Kuki thingnuoi zouse khat’a adinkhom theina ding zoh boipi masa’u hite - KNF - LD June 2011

Achiesa June nisim 2, 2011 nikhuo’n Ebenezer Camp ah Kuki National Front in Thadou Kuki Journalists’ Union (TKJU) le Manipur Hills Journalists’ Union (MHJU) ho ana kimupi’n, hiche nikhuo chun KNF General Secretary Aron Kipgen in mipiho hedding in anuoiya hung kisundoh hohi media ho mangcha’n phuondohna ananeiye:
India sung’a cheng Kuki Nam miten ‘Kivaipuohna tum’ Kuki State neiding deina jal in 1946 kum in Kuki National Assembly ana kiphut in, 1960 in Govt of India kom’a zihtho in Kuki State ahin thum pan uvin ahi. Ahin Govt of India in Kukite eina nahsah pouve. Chuin Mizoram a um Mizo National Front in Mizoram Statehood a ding in arms struggle ahin pan in, ‘Kawnpui Convention’ a Kuki National Assembly in Kuki-Mizo nam khat ihiuve, anati uvin, hiche Statehood kithumna ahin, Manipur sung’a Kukite chenna zouse zong ana huoptha sah un, hizeh chun Kuki National Assembly in Mizo state muna ding in pan anala’n ahi.
Ahin Mizoram Statehood a ding’a kinoptuona Govt of India toh Mizo National Front in June 30, 1986 kum in “Mizo Accord” ana kaita’n, Mizoram State ahung kisem dohtai. Manipur a Kukite i chenna’u khatcha zong hiche state thah’ah ahin huopsah tapouve. Kukite dalhah in ana um tauve. I-nam’u gentheina le donselou’a ei kikoi zing’u Pu Nehlun Kipgen in ana pona in Kukite i-gentheina’u hi ei-le-ei kivaipuohna “KUKILAND” kiledoh tapuonte ana tin, 1987 kum in namsung’a lamkai, haosaho tosotna jal’in KUKI NATIONAL FRONT ana siemdoh tai. Hiche hi Kukite’n Kuki State, KUKILAND hiem le thal pum’a i-hinsad panna’u ana hi. Tuni’n namsung’a thingnuoi Orgn tampi ahung umdohta’n , kithatuo kimattuo, nam kikhen telna sodtah ahung um nung in United Peoples’ Front (UPF) le Kuki National Organisation ( KNO) in i-hung kipunkhom uvin, KUKI nam kiduo dohna’n akila’n, mipi zong alungmuong in ahi. Tuni’n KNF in ahin patdoh Kuki State, KUKILAND a dinga Kuki Arms Revolutionary Movement hi Suspension of Operations (SoO) chan GoI toh i-hung lhung tauvin ahi.
Kipapi umtah in Kuki Innpi Manipur in nam guollhang, thingnuoi organisation zouse khat’a dinkhom ding ngaituona’n Kuki Nampi Palai ahin siemdoh uvin, KNP makaina’n Kuki thingnuoi zouse Sept 2, 2010 in Delhi a meeting ana kibawl in namsung thingnuoi organisation cheng in lunggel seikhomna ana kineiyin “Delhi Declaration” ana kineiye. Hiche meeting a ana kideipen chu Kuki Nampi Palai in Nam Sepai zouse khat’a dinkhom theina di’n pan lahen ti anahi.  KIM/KNP in UPF leh KNO khat’a dinkhom theina ding lampi ahol’e ti kinepna akinei laitah in, hinkhuo phal’a, meichang masang’a ob-do’a gamtum delna’a pang Kuki thingnuoi lamkaiho kidohna umtalou in, Kuki Innpi Manipur in Dt 30/10/2010 Cabinet Meeting ah KUKI STATE DEMAND COMMITTE ahin siemdoh kittai. “Kuki National Front hiem le thal pum’a, thisan le hinkhuo phal’a KUKI chate ding’a Statehood KUKILAND kahin delna uva, kahina’u kapailha uvin, Kuki state khat muna ding ahipou leh KUKI thingnuoi zouse kihoupha’u hitin, iki noptuona’u Forum khat a nampi’a ding in kipunkhom ute” ti’n, nam kitho kitna ding lampi kana siem uvin ahi.
   Kuki State Demand Committe hi namsung revolutionary organisation zouse hedpieh lou’a Kuki Innpi Manipur in akisiem/aphudoh ahizeh in 26th Nov 2010 ni’n KNF Peace Camp, Ebenezer mun’a KIM/KNP/KSDC lamkai zouse ana kikou in, ipi hileh Kuki thingnuoi zouse khat’a adinkhom theina ding zoh boipi masa’u hite .. I-din khom thei tieng’u leh Govt of India kom’a i-dei i-ngai.. statehood thu seina’u hite. Hiche zeh hin Kuki State Demand Committe hi kihoutuohna aum tokah in Nam damtheina ding in imacha bawlda uvin lang, Kuki Nampi Palai nahin patdoh’u Kuki thingnuoi zouse khat’a dinkhom ding itipa’u zoh chu habuoi in hin boipijo uvin ti’n kinoptuona ana kineiyin ahi.
Mipi’n eihedthiem pieh ding uva kadei’u chu Kuki State Demand kibawl hi kadeimo’u ahipoi, Namsung kihoutuohna umlou’a kibawl ahizeh in anjo tieng Namsung kihed khielna, kikhen telna, nam boina zoh hung hikha kit inte ti ahi. Chule KNF in 1987 a pat’a Arms Struggle kahinpat uva, thisan le hinkhuo tampi Kuki State, KUKILAND a ding’a kahin phal zeh uva tuahi Kukite’n Govt of India toh political dialogue neitheina lampi, SoO eineipi’u hilou ham? Hiche zeh chun tuni’n namsung’a kineppi tah’a kinei KIM, Social Orgnisation ho’n KNF hihen lang adang dang Kuki Nam Sepai Organisation  zouse kathuoh gimna’u hi donselou in koi hih uvin kati nuom’u ahi. Tuni’a hi keiho donglou’a Kuki Innpi in Kuki State Demand Committe asiem uva adei dei abawlpa’u hin UPF le KNO khat’a adinkhom theina ding atohkhah ding ahi hi neihed pieh uva i-zoplo’u diu katepna’u ahi.
Chule Social Orgnisation le Kuki Nam mite’n SoO hi i-mankhiel loudi’u katepna’u ahi. I-thusim’u sumil pou hite. Kuki National Assembly in Non-Voilence mangcha’a Kuki State ana thum’u donse lou’a ana umzeh a, MNF arms struggle ihin zop uva Kukite’n chanvou i-neithei khah’u leh inati’u ahi.
  Ahinla, dalhah in ina umthou thou uve. Tuni’n KUKI chate ding’a Founder Pu Nehlun in 1987 a KNF ahin phudoh a arms struggle ahin pat zeh’a GoI to SoO ihin nei uva, Kukite hung kihou tuoh uvin Political Dialogue nei ute ati’u ahi. Nam kuongtawl, Nam Sepai lamkaiho dong lou in koima’n thil moh bawl bawlda hen ti katepna’u ahi.