WWE sung guh thushim

Vannuoi leisiet chung’a kichepna jad tamtah lah’a akidang diehset chu World Wrestling Entertainment ahiye. Hiche kichepna hi eiho lah’a ahanlam zepho’n mingol kinah atiuve. Ahan zep vang chu ana chingzep tei ahizeh in phatah’a i-gel leh athusei’u hi adihna i-chan hamkhat tah aum’e. WWE vephuon vanglah hochun amoh ngah jieng thei pouve. Banneicha’a akichep veho’n electric kisuhlou zeh’a khatvei tou avetlou’u zong leh koiyin ajo’am ti henuom tinten in internet ah ahol jieng uvin ahi. Hiche holah’a chu nang zong najao’em? Ahilou leh mingol kinah ahi ti’a avetnuom lou beh nahi’m? Ka thisan in azoupoi akibawlna ho’u ti’a vengamlou nahi zoh’em leh?
Lungsietna beihiel’a ahung kibawl chah tah tah’u vang chu avet ahahzep teiye. Mi thahad tah tahho zoi lhadah dah’a ahung kibawl jiu vang phatah’a i-gelleh tuonsod’a chinden thei ding natna hitante kiti zong leh seikhiel hibehseh puonte. Ahinla kidang tah in amaho ana chuti ji pouve. Ahad tahtah ho zong akidelpi pa’n phatah’a avoh zoi deh jieng ji vang in aphad ahung kilem khah leh anatna zouse hoilam geiham ti kihedoh theilou hiel in ahung haddoh jieng ji’n, hindi te serial hotoh akibahna tah tah zong aum’e. Hiche hi ipi tidan ahidem? Ipi atileh thakhat tah’a hung haddoh jieng ji’u ahidem? Ipi damdawi aneh’uh ahidem? Lungdon um nasah’em? Hiche ho ana lungdonpi nahileh lungdong tahih in, na lungdonna chu anuoiya hin suhlhap in um inte.
World Wrestling Entertainment kiti hi sports ahijieng vang in entertainment ahiye. Hizeh’a chu mipi thanopna thei pen ding’a ahin guondoh uva, mipiho’n hibangse’a hi i-thanoppi’u ahiye. Chule WWE hin mipi’n athanoppi akihed uvin, hiche mipi’n athanoppina’u lhasuo lou’a chiepi zing ding chu alungtup thupi pen’uh ahi’n ahi. Azehchu mipi’n athanoppi lou hileh asummuna’u taang ding ahitai.
TV a ahung suodoh tieng leh akinah’uh i-vet uva, lunglhai sel’a i-panpi khat in ahin jo diehset leh kipapi ding chu eiho kin ahivang in akina ho’a ding in hichan ahung lhun theina ding uvin abawldi’u atam lheh jieng’e. Amasapen in amaho’n mipi ngailudna achandi’u akhohgel pen uve. Chule WWE kinahna’a ajao theina ding uvin phatah in training alaa uvin ahi. Training zoulou hochu alim’u zong i-mudoh pouvin, amin’u zong zahdoh in aum sese tapoi. Training ajo vang uvin mipi deisahna achanlou’u leh kintah in lahdoh in aum uvin, kichepna’ah jaosah ahiji tapouve.
WWE kichiem hohi phatah’a i-vetleh achunglam’a iseisa’u bang in khatvei thut thut leh ahad uvin, khatvei leh ahadmo kit jiuvin ahi. Akinah masang uleh akinah ding dan ho’u zouse phatah’a script kisun masa chihcheh ahiye. Hiche a script dungjuiya chu kithiemchuh masaji’u ahi’n ahi. Iham ti’a bawlkhiel aumkhah louna ding’a kiveng masa’u ahiye. Film tobang’a achalohdi’u dan umsa ahi’n, hiche akithiem chuhna’u chu atah tah’a mipi masang’a ahin thodoh ji’u ahi.
Mipi awgin phatah in angailha zing uvin, mipi’n koi angaisang’a, koi chu had leh ti’a adeipen’u ham ti zong phatah in avelha zing uvin ahi. Mipi atamjo’n angaisang pen pen chu champion hina apiehji’u ahiye. Hiche tieng chule mipi’n WWE ahin ngaisang cheh cheh kitji ahitai. Hizeh’a chu WWE champion hokhu ahadpen ahiuve tithei zong ahidieh jipouve. Mipi deisah achanzeh uva champion title chang ahiji bou uve.
Mipi vetding in athanei zouse pan in kina tobang in um zongle’u bawlthu ahibou’e. Itiham’a akisuh tieng’u leh anem lailai kisuhpieh ahiuvin, chule athanei zouse seng tobang’a abawl vang uva chuti lom lom’a a hit umbehseh jilou ahiye. Chuti’a bawlthu ahileh itidan’a thisan naisan luongdoh jieng thei ahidem ti thudoh aumkit’e. Umpire hokhu mohseh’a um ahi pouvin, amaho khun aguh’a chemcha tobang neocha khat ahivang’a hiemtah akipuoh ji’u ahiye. Hiche hokhu aguh’a akina teni apieh ji uva, hiche’a khu aphe tam nalai lai aki adkeh ji’u ahibou’e. Thisan tamtah luongdoh zong leh amaho’a ding in imacha asietna aumpha poi. Azehchu hiche ding’a chu phatah’a akum’a sim training alahji’u ahi. Chule advertisement ho’a khun performed by professionals ati jiuve. Amaho umchan chan school chapang ho’n atho uva akisuhkhah di’u venna’a abawl’uh ahiye. Tahsan hahsa nasah’em? Ama hohi live stunt bawl ahiuve zong akiti’e.
Chair le manchah dang dang la? Hiche ho’a khu akikhet tieng’u leh akhenpa’n tha apepuon, tha anunglah joi. Akhetpa sang’a ama gimjo ding tina ahiye. Atah tah tobang’a hadtah’a akhet vang’a ama’n anungkai ahizeh’a nalou hiel ahiye. Mihiem ahadpen zong metal chair a akikhet leh atahsa chung’a anung kilanglou ding ham? Kilang teitei ding ahiye. Thisan chiena hung kilangdoh teitei ding ahi’n, WWE avang akilangdoh ngaipoi. Hiche zong chu atahsan louho’a ding in aphotchetna ahitai.
Duan Johnson (The Rock) chu WWE aludtil laiyin miphatah tobang in ahung kilangdoh in ahi. Hinla mipi akuon’a seiphatna amu diehlou zeh in amachal theipoi. Hiche phad chun ama’n a character ahin khel in, agilou lampang’a ahung kilahdoh kit phad in ahung minchie panta’n ahi. Ring sung’a John Cena le Randy Orton akisuhtuo lhon leh kithattuo ding akisah lhon vang in polam alhun lhon tieng leh guolcha phatah ahikit lhon’e. Police ho’n party bawlho adel buluna uva John le Randy table khat’ah ana toulhon in, nuomsatah in ana kitod lhon in, kidang asalheh uve. Randy Orton in John Cena pa avoh chu thil melse ahipoi, azehchu atah tah ahilou zeh ahiye.
Hiche tobang maimaiya WWE kichepna atahbeh hisah’a ana lungdong ho’a ding in achung’a thu kisei hohi tahsan hahsa lheh inte. Hinla tahsan le tahsan lou chu thuchuom hitaleh hiche hi thudih ahi’n, thuzou ahipoi. Tuban WWE navet tieng leh atah tah tobang’a navet sang in bawlthu ahiti’n vele chun ahung kikhet puohlah lah phad’u leh nadip nakidopna chu olzep tante.