Helien Hangsing's 5 Minutes Fantasy with Lhainei Haokip

Nitin hinkhuo’a lunggel zouse luodim den, chiedoh theilou le lungthim’a mangthei lou hiel’a lung in agel zing vang chu Laijon Digest Miuzeeko Awards 2009 a Lhainei lasah ahijieng’e. Hiche laa hi TC Network ladeilhen’a kamudoh nikhuo akuon in kalungthim’ah amang thei tapoi. Lhainei lasah ijad kana ngai’a, ijadvei alim kana musa ahivang in hiche laa asah’a, nampi khankho ding geltah’a mipi lungthim asuhnou jieng hin nasatah in kathin kalung atongkha’e. Mihiem asang’a sim masang’a lung ngam tah’a laa asah theina chu azeh ipi ahidem ti kagel in, lunggil’a nam ngailudna chun nampi makhuo ding ding gelsaona zeh’a nampi’a ding’a Pathien akou ahi ti’n kagel in, ama tobang nam nungah Kukite’n i-nei khah zeh uvin kalungthim akipah lheh jieng’e.
A lasah chu avel vel in kave’n, kave chim thei hihbeh’e. Nikhuo khat, nikhuo ni.. ti’n achal zing in, nikhuo chal zing toh kilhon in lungthim in Lhainei angaisangna akibelap cheh cheh jieng in ahi. Jingkah thodoh’a taona manlou in hinkhuo asuh nopmo chuom tobang khun Lhainei laasah kangai khah lou nikhuo chu hinkhuo kipana abukimlou nikhuo ahi jieng jitai. Hizeh chun hiche laa chu mobile phone ah kaki koiyin, ringtone in kamang in, phone call ahung sieh leh kipana achamkim zep tobang in kahe’e. Hiche sang’a ka kipana chungnun sahjo chu alarm tone a kaki koithei chu ahikit’e. Jingkah matah, jingtho masang leh ka lukhap komtah’a Lhainei in Kuki Chate ahin sahji vang chu... i-mut tei tei ding lungthim anuom ji tapuon, kipahtah’a jingtho’a, nikhuothah kimaituopi ding’a kiguon ding chu ahipai jieng jitai. Hizeh chun keiya ding in mobile phone le Laijon Digest Miuzeeko Awards ahung umdoh kipa aum diehset’e.
Lhainei ngaisang’a hinkhuo kaman zing vang in atah in khatvei jiengcha zong kamu kha hihlaiye. Khatvei beh kimupi’a, kamcheng tah’a kipathu seiding chu kagel zing in ahi. Hizong leh mi zahchase kahizeh in lawi le guol ho hedding zong kanuom puon, aguh in kalungthim sung’ah kaching zing jota’n ahi.
Jaankhat hou-inn’a lasa mi hung ding ahi ti’n ahung kiphuong in ahi. Koi koi hung ding ahizong helou hiel’a kaga kikhop leh... veuvin, amasang lamtah’ah Lhainei ana tou kamu’e. Hichun kalungthim akipah thanuom behseh in, ka sunglam’a thin le lung ho zouse kipah in akichom uve. Amasang lam’a ama touna lam chu kajuon in, chibai gabawl ding in kagel in ahi. Hinla khanglai lamkaiho’n koima amaho touna lam’a achie ding aphallou zeh uvin ei nungkai uvin ahi.
Chomkhatsed kaki ngaituo in, chuin innlam’ah kaki nungle in, ka paneote digital camera kaga lah guot leh Tongkholien (ka paneo chapa) in ana kipuohdoh man in ahi. Hou-inn lam kahin delkit in, Tongkholien chu hoilaiya umham ti’n kahol hol jieng in, hinla kamu zou dieh poi. Hou-inn sung lam’a kalud in, kahung poddoh kit in, stage chung lam’a kot’a zong kaga lud in, kahung poddoh kit in, hinla ka mihiempa chu kamuzou tapoi. Kalung chula ahang in, phad lah achie zing in, ka mobile camera a Lhainei lim kab jieng ding chula.... chuche ni jingkah lam chun ka upa chanu’n achoile le in, baltin sung’a tuilah’a chun ana sob in ahileh ka mobile chu man’a lah ahi tapoi. Tongkholien hol’a hou-inn polam’a kadinle kah chun Lhainei in khatvei laa ana samante... vo henu..!!
Tu’n vang Tongkholien kaholna chu azeh achuombeh ahitai. Digital camera lahpieh ding leh khatvei beh voh teitei ding ti ahita’n ahi. Lunghang tah’a khosung lah’a gaholdoh ding kati’a kachiedoh guot laitah in hou-inn sung’a conductor pa’n Lhainei in laa khatvei bouseh asah ding tobang’a asei kaja’n, conductor pa gagihsal ding kalung ajatinten kittai. Tongkholien phone bawl ding kiti zong le... ka phone umdan kaseichu i-heddi’u kagingcha’n, midang phone kaman pieh guot zouse lah.. balance kaneipoi ti jiengseh ahikit uvin. Mihiem hovang hi’o... akidang lheh’e. I boina’a eihin kithuopi ding mihiem i-hol tieng leh ana umjilou hichu’o. Ken zong mi kana kituopi khahlou vang himai thei ahiye. Pienthahna tobang chet hihih zong leh kiheddohna khat kaneibe zeh in Lhainei chung’ah ka kipah thou thou’e. Hizong leh camera khatbeh kaholdoh tei angai nahlai zeh chun suhlhai toulhai katho jieng in ahi.
Kanaopa alawiho khat kagaalmu in, ama akuon’a heddoh teiding kati zeh in aumna lam kanaiphei in ahi. Alawipa seidan toh abah leh hoilai hamkhat’a michavai guolse’n party abawl dan’u hileh akilawm’e. Amun kadoh leh kahepoi atikit’e. Hinla hint phatah eihin pieh zeh in kalung anuom zep in, kalung anopzep vang chun aumna’u holdohna ding kabuoi kitta’n ahi. Boina khat akichai leh adang khat kou masatna zong umlou hiel’a hung chomlud jieng dan ahiye.
Phad achie zing in, thupi seipa kouna ding’a Lhainei in laa khat asah chu khoto lam akuon in kagaalzah’e. Ka thanei zouse kapan in kahung lhaitou leh ana sachai chet in.... ohe... daa tahbeh ati’u chu kahi hitam? Leisiet’ah lungmuonna le kipana vang achamkim hihbeh jieng’e. Hinla mihiem hina dol in athuoh thep mai angaiye. Lhainei lasah lai lim kakabdoh tahlou zeh chun kalung ahang thim lheh jieng’e. Hiche’a moh tou tou sang in innlam kichie tahen ti’n kahung kipatdoh tai. Hou-inn compound kaphah chet in ka naopa toh kaki tuoh kha chet lhon in ahi. Na nehmoh lah’a chie nahiya hibangse’a nei gimsah ham ti’n ka housetai. Athu le laa ama’n zong ahe diehpoi. Lunghang tah in kadalhatai. Ka innmai’u kalhun leh thupi seipa’n Lhainei lasa ding’a ahin kou tobang kaja’n, phatah’a kangai leh music ahung ging in, Lhainei in laa ahin sata’n ahi. Camra la umta, Lhainei in laa sakit, tu’n vang chu lim kablou in kium hihbeh inte ti’n hou-inn lamchu kahin deltho jieng tai. Hou-inn mai kalhun ding kuon in zong laa asa sa nalaiye. Kipahtah’a kalhaikit leh hou-inn maiya chapang kichiem hokhat kapal lhu kha khel khel in, aluchang akitakeh kha kit nalaiyin ahi. Kavet leh aluchang akuon’a thisan ahung luondoh phad chun ka dalha thei tapoi. Hoilang kohom akuon’a hung kibot hitantem, hiche chapang chu, akhop’a kikhomlou ana himai tale’o... ohe... keila buoilou ding, amala buoilou ding.. Kakhut’a chapang pa kapom laitah in Lhainei in alasah anga chet jieng’e. Vo kaden... khang kikhel mai henlang, nilhah bultil akuon in camera chu ana choi maileng kati behseh jieng’e.
Kahapan vang chun ka lolhing zou tapoi. Hizeh chun kalungchang ana’n, ka ulsa aluongdoh in, kati asa’n, hapen in kapeng in ahileh ka luchang chu molkang khat in ahung kikhen chet jieng in ahi. Lunghang tah’a kadadoh leh Geography teacher pa’n duster eihin vetsah kit nalaised’e. Kanung kama’a tou ka class mate ho zouse chun eihin nuisat uvin, kapona’n, alonaje lah aumpuon, hizeh chun ka thang atomkit in, teacher pa’n ipi aseiham zong ngailha talou in ka note book kaphongdoh in, LD 5-Minutes Fantasy ti’n kasun in, achung’a kasut sese hi anuoiya chun kahin sundoh tai.