Ngailudna Black Day hihen (Editorial)

1993 kum’a NSCN (IM) ho’n lungsietna beihiel’a ana tha laijon ho zouse i-lunghempi uve. A lhagao’uh lungmuong’a acholduona ding in i-taopieh uve. Kuki ahizeh’a anathi nunao chapang ho adiehset in i-geldoh uve. Hiche thu seidoh’a aumtieng leh lungsung’ah lhasietna le puldouna akilangji. September 13 hung lhun tieng leh amaho lunghempina’n puonvom i-tahdoh uvin, taona i-mang uvin, lunghem tahzeh in i-lunghem uvin, ahinla cha le nao tamtah in exam nikhuo’n amang jiuve. Nungah guollhang ho’n kimutuona le college kaina’n amang jiuve. Nu le pate’n office kaina le natohna in amang jiuve. Kahlah’ah lunghem nikhuo’a mang zong aumnai. Kilungtuoh tah’a taokhom nikhuo’a manlou’a khoh khat in gel ahi. Hinla houbung khat ihilou zeh uvin kipumkhatna hi aum thei tahtah poi. Houbung khat techu hou-inn dang’a gatao ding nuom pouvintin, houbung khat kitte zong chu hou-inn dang khat’a gatao ding zong nuom dieh pouvinte. I-hou’u vang Pathien khat iti’u hileh akilawm thounai. Pathien khat houte chu houbung in eihin khen tauve. Hizeh chun Pathien hou hilou in houbung hou toh ikilou tauve.
Nam sepaiho kigopkhom louzeh’a nampi machal lou itiuvin, atiho zong kigopkhom ding kitileh ama ama houbung bouseh phatsei kit tauvinte. Nga in atam athipi’n, mihiem in atam ahinpi’e. Thinglhang kho neocha cha, inn som le somni kikah tou in i-cheng uvin, hiche chu khantouna kigamla ahitai. Haosat dalhah’a khodang toh kigopkhom’a kho pilhing khat suoding i-gelthei pouve. I-khuo le veng i-ngailudna chu pachad aum’e. Chubangse’a khuo le veng ngailu hochu khosung’ah i-cheng kit pouvin, khopi sung’ah inn bahara in i-umkit uve. Mitamna’a cheng nuom ihiu leh thinglhang hizong leh inn sangkhat sangni umna khuo chu khopi ahijieng’e. Inn som tou’a government in pucca road hung siem puontin, street light hung vahsah puonte. Hizeh’a chu kenglam kiti hi eimite’n i-haman diehset’uh ahiye.
NSCN(IM) khut’a ana muolliem laijon cheng hin tuni’n eihin veleu, ipiti eihin gel tauvintem? Technology lam’a vang mitin i-khangtou uvin, mobile bang i-choi suoh kei uvin, hinla nampi ngailudna lam’a kipumkhat ding leh thisan khat bang’a hing ding te chu kichide mo hiel in i-um tauve. Kuki ahizeh’a ana muolliemsa laijon cheng lhagao aka kaa jieng louna ding’a eimaho gam i-tundoh phad’u hita lou ham? A innsah le innlhang toh kihou theilou techun hoiya gamtum ikimu diuham? Gamtum del ihiu leh gamtum muthei ding in kiguo ute. Gamtum i-nei uva, eiho le eiho ikitha tha’u leh koi in eihung kham tauvin tem? Hizeh’a chu gamtum muding’a lawm ihi pouve kiti ahi. Gamtum muna ding in eimaho innsung kisiemtub masat’u hite. Ngailudna’n Kuki chate lah’a vaihawm hen. Tukum’a Black Day i-mandi’u hi Pathien phatthei buoh i-channa’u hihen lang, Kuki chate lah’a ngailudna’n vai ahawmna hung hitahen. Amen.