Last episode of Ahing zing'e

Jaan ihmumo jen in kalung kagel gel jieng in ahi. Achaina’a kathulhuhna chu Lhingneo kikhenpi’a kanu kipasah ding zoh kahin lhengta’n ahi. Hiti chun jingkah lam nidan 3:17 chet in kahung thoudoh in, Lhingneo ading in lekhathot khat kahin sunta’n ahi.
    Lungsiet Lhingneo,
        Sunkhuo jaankhuo’a kalungmuonpi Neo, tuni’n nakom’ah seinuom themkhat kaneiye. Nang in iti nagel ding vang kahepoi, keiya ding’a kipana thil ahilou zeh in nangtoh kimelmu in kaseidoh ngampoi. Hizeh’a chu keima khel’a hiche lekhapeh hi kahin sol ahiye. Neo, kahin lungsietna asang lheh jieng’e. Chule kahin lungsiet zeh’a genthei kathuohna zong asanglheh jieng’e. Thichan’a kagenthei ding hizongleh nang lungsietna akuon in nungchon puong’e kati ahi. Hinla thil khohtah khat chu, eini kilungsiet zeh’a keima gentheina chu athupi poi, kasen katuiya eina khoukhah ka chunnu mitlhi luonna ding’a laituol kalen hi thiemmo kakichan lheh jieng’e. Ka chunnu in phad chomcha jieng zong kipana mulou hiel’a, gentheina le dipdamna’a hinkhuo aman zing zong hi thiemmo kakichan’e. Kachunnu luonlhi luong cheng hi kadamsung’a kaditdoh zou ding ahi tapoi. Leisiet chung’a phad chomcha bouseh hinkhuo aneilai sung’a hi alunglhaina bangtah’a hinkhuo mang ding in kigellhahna kaneitai. Nunglah ding hahsa lheh zong kahin piehsa lungsietna chu nunglah kit mai tang’e. Na laijon cheng lungdei toh nuom’a nalenkhom ding kahin kineppi’e. Damsung’a ding in mangpha.
            Seiboi
ti’n molmo tah in lekhathot khat kahin sundoh in, phatah in kalheptub in, lukhap nuoiya kaki koiyin ka ihmutai.
    Jingkhuo ahung vah in, kalung’ah thildang imacha aum thei tapoi. Hiche lekhathot hi iti kapieh ding hitam tibou kagelta’n ahi. Inmaiya kana umleh chapang ho ahung kijod phei uvin, hiche holah’a chun Niengboi kiti chapang feltah khat aum in, amachu kakou in, phatah in kaseipieh in lekha peding chun kasoltai.
    Chomkhat zou in Niengboi ahung pheikit in, kadoh leh a innmai uva ana um in kahin petai ati’n ahi. Jingkah ann-neh phad ahung lhung ta’n, kanu toh ann-neding in kachiedoh lhonta’n ahi. Mipi lah’a chun Lhingneo kamu tapoi. Hiche ni jingkah ka ann-neh chu hoilaiya lud ham kahe tahihbeh jieng’e. Ann-neh zou’a inn kanung lhun lhon phad in kanu zah’ah thil umdan hochu kaseipieh ta’n ahi.  Kanu’n kalunggel chu ahedthiem lheh hileh kilawmtah in eihin tousodpi tapoi. Hinla kachangseh’a eihin dalhah zeh chun ipi agel ahi kahedoh theipoi, kalung adong bepseu’e.
    Jaan nidan 7:15 dontah in Niengboi ka inn uva ahung lud in, Heu Seiboi, u-Lhingneo in nang’a ding lekha eihin choisah’e ti’n lekhathot eihung pien ahi. Kintah in lupna lam kajuon in, lupna chung’a chun kave’n,
    Kalungsiet Heu Seiboi,
        Sunkhuo jaankhuo’a kalungmuonna nangbou nahi’n, tu’a hoilam belding’a neihin sol hitam? Ikitepna cheng shitui bang’a luong mang jieng ding hitam? Nahin thusei hochu kahethiem’e, hinla nang akuon’a kazah ding in kilawm kasapoi. Damsung’a ding’a neihin lhahdoh tahbeh ding hitam? Chollha vah nuoiya ikitepna chu chollhanu’n zong eihin hedpi lhon’e, thangvan sang’a ahsi ho’n zong jasuoh nauvinte. Eihin kithuopi ding dang kanei diehpoi, chung chollha le ahsi ho masang’a nathusei chu zouthu hiding hitam? Ahing zing ding’a iki lungsietna chu hoilamba hitam? Hiche zong chu na haimil ding hitam? Heu Seiboi, ken kahin lungsietna vang ahing zing’e.
        Genthei Lhingneo
    Lekhathot kasim chai chun kakisih lheh’e. Ahing zing ding lungsietna kana pieh phad chomcha bou’a adaailhah jieng ding chu ka id in, hinla kana sumitta’n, lonaje helou in ka umtai. Kanu’n ka lekhathot sim chu amu’n, khoh asalheh jieng’e. Kanao, nalungsiet toh nahin khen puong’e ahung ti’e. Kanu akuon’a phalna kamu phad chun seibe ding umtalou kipana’n eibawm in, Lhingneo kom’a ding in kapoddoh tai.
    Kholai zong kagei hih laiye. Vengnuoi lam’a vadung lam’a chun meithal ahung kikab ging in, melmate pengin akijatai. Chomkhat zou in khosung lamkaiho’n gaaldah ahin voging tauve. Khosung mipi chu lungdon tijad in aluo gamtai. Innlam’ah kale lhaiyin, kanu kaga puidoh’e. Khosung mite’n kiselna ding mun kisiemna lam’a chun kanu kapui pheita’n ahi. Guollhang zouse khongah ding ahin tikit uvin, kanu kadalhata’n ahi. Ahinla melmate chu ahung had behseh zeh uvin hed manlou kah in khosung ahung lud tauve. Duty puoho’n anan zoulou zeh uvin amaho zong ahung jamdoh tauve. Mipi adon chieh uva ajamcheh uvin, khosung chu kaa le maona’n abawmtai.
    Ka meithal kakiput in, melmate chu kakab pantai. Chule mipi lah chu kavetle leh Lhingneo kagaalmu’e. Chuin ka panmun kadalha’n Lhingneo komlam kadelpheiyin, hinla meichang leng le atam behseh zeh chun kadeibang in kalhaihad theipoi. Lhingneo... Lhingneo... ti’n kakou in, kakhut kajab’e. Hinla Lhingneo in eihin mupoi. Akom lhun kaguo ham in, oltah in katoipheiyin ahi. Lhingneo kom chu kaga lhung thei vanglah’e. Neo... kahing lungsiet zing nalaiye, kicha hih in, kei ka umnai kati’n ka ngongkoiye. Lhingneo in alungsietna thimthu seiding tamtah aneiye ti kahe’n, hinla phad in eihin ngah lhon tapoi. Amel’a chun lungsietna kamu’n, amit’ah kipana kamu’n, hinla imacha seidoh thei kanei lhonpoi. Melmate ahung naizep zep phad uvin jamdoh loi hite ahinti’n, kakhut atuh in, eihin kaiye. Nang ana chiedoh in, ken khosung kadalhah theilou ding ahi kati’n ahinla anuompoi. Eihin tuhchah kheh in, thi le hin kikah’a kilungsiet kahi lhon maitai. Hahsat vang ahahsa lheh’e. Kalungsietna chimlou in hinsei ing’e tiding kanuom in, ahinla ahithei tapoi. Hiti’a kakinotuo lhon kahlah in Thanglien ahung chomlud in, anaonu chu adahbul in aman in, kei einungsot’e. Hiti chun gamlah’a ajamdoh midang holah’a umding in asoldoh in, keichu melmate kikabpi ding in ka umdentai.
    Melmate chu anasa behseh jieng uve. Kapan nahnah vang uvin kalel tauve. Kholhang asam uvin, inn ahal uvin, eihin that that jieng tauve. Panpi ding neilou nao chaga bang in kiselna thei hol in kakipei tauve. Meithal in akabkhah’a toi zou talou hochu chemcha’n asad uvin, athat kit nalaised uve. Meithal gin gin nalam chu adel jieng uvin, panzouna hoi ahitapoi. Hizeh chun ken zong ka meithal kadalha’n kajamtai. Gamnuoi lah’a chun kalhailud in, kakhuo’u chu kanungvet leh luonlhi’n eihin chupden tai. Hinla bawlthei imacha aum dieh lou zeh in kahinna kihuhhing ding bouseh kagel’e. Phad sodtah kalhai zou nung in khosung mipi honkhat holah’a kaga lhailud in, khosung umchan kamit’a kamu hochu kasei leh gamnuoiya chun kaa le mao awgin akithong jieng’e. Mipi lah’a chun Lhingneo kahol in, hinla kamu zou tapoi. Kanu chu aninglam khat’ah ana um in, kanao, dam’a nahung lhung hinam boi ati’n eihin ngongkoi’e. Lhingneo umna kadoh leh melmate ahung had behseh phad uvin kakithecheh uvin, Lhingneo in Thanglien in ahin kaipheiya eiho inn-nung lam akuon’a gammang lah juon holah’a apuilud kamui ti’n eihin dawnbut’e. Ka umna’u chu simlam le maallam tobang ahitai. Kapona’n kakab in, hinla aphachuompoi. Amaho jamna lam’a chu lhaidoh ding kanati ahina’n, hinla melmate achie’u kamu phad in kahung kile tu’a kahung nalam kahin zot ahiye. Melmate chun adelpha uvin athat tadiuvem ti bouseh kagel gel jieng’e.
    Phad achie zing in, hinla Lhingneo toh kinung mutuona aum thei tapoi. Hoiya um hitam ti zong kahedoh zou tapoi. Gaal ahung kichaiyin, hinla Lhingneo te innsung thu kavel zahdoh kit tapoi. Innsung hahsa akihi zeh in kanu toh kaki hinsuo thei lhonna ding in meihol kabawl in, hizeh chun lungmuong’a Lhingneo hol’a vaikuondohna thei phad kamupoi.
    Tuhin kum 15 avalta’n, Lhingneo in ji aneiyin, chanu 2 le chapa khat aneiye tithu kaja’n, khatvei beh gakimupi tei ding kagel zing in, hinla keizong amabang’a ji le cha nei kahi tahzeh in kanuom tapoi. Hinla Lhingneo kalungsietna vang ahing zing’e.
    (Hiche Love story ahing zing’e hi alhing’a simnuomho’n novel’a suodoh ahitieng leh ina simdi’u himai tante. LD ading’a hung kila chomlele ahi’n, akilawmlou behseh suodoh khah aum zong leh ina hedthiem ding uvin kahin tiem uve).