Nisa keiya ahiye

 Nisa a fee pieh ding na ngaituo khah’em? Electric hapta khat’a ni 7 load shedding um zing jieng zong a fee phatah’a kipe zoulou’a, nisieh’a vah zing jieng nisa a fee pieh ding hile vang, iti ahahsat tadem? Hinla, nisa fee dong ding in Spain gamsung’a um Galicia gam’a hung kuondoh, Angeles Duran kum 49 kitinu aki guovam seltai. Azeh chu Angeles in nisa hi keiya ahi ati ahiye. Iti nagel’em?
Tukum November nisim 26 nikhuo chun Angeles in local notary office khat’ah nisa ama’a dan in register ana bawl in ahi. Daan kahe mama’e, International agreement a chun vanlaijol’a um ni le lha, chule ahsi hohi koimacha gam in amaho’a dan’a asei theilou ding ti ana um in, hiche chun mimal akaan khapoi ti’n online thusuo El Mundo ana hedsah’e. Hiche hi anuom nuom in ana bawlthei ahi’n, hinla koima’n abawl puon, amasapen kahi toh kilhon’a keiya hiding ahi ati changmiel jieng’e. Hiche toh kilhon chun kum vanthamjol’a kum billion a sim ana umta nisa chu Angeles Duran a ahiti’n notary office chun register ana bawltai.
Angeles Duran in tuhin nisa mangcha leisiet mihiemho’n nisa fee apieh ding uvin hedsahna ahin neikittai. Kidangtah in ama’n nisa fee a amu sumho chu 50% Spain government kithuopina’a apieh ding in aseiye. Chule 20% chu Spain gamsung’a pension fund a apieh ding, 10% research bawlho’a ding, 10% kit chu vannuoi leisiet chung’a mihiem ho’n gilkiel athuoh tahlouna ding’a kithuopina’a apieh ding, adangse ama chang ding in aseiye. Mi huongphal tah vang hithou ding dan ahiye nisa neinu hi.
Angeles in hiche thuphuon ahin neizou pungkah khat tobang chebep nalaiyin US gamsung’a Vice President 45 channa’a ana pang Al Gore in US Federal court ah Angeles chung’a case ana bawl in ahi. Global warming toh kisaiya nisa neinu chung’a case abawl ahiye. Hiche chungthu’a hin Angeles in Al in Global warming hi mihiem ho bawlthu ahi ti’n ana seiyin, tuhin ka nisa ahin ngoh kittai ti’n aseiyin ahi. Hinla lungthoina vang anei hihbeh’e.
Numei khat in nisa keiya ahi ahin ti jieng hi thil kidang tamtah lah’a akidang diehset ahitoh kilhon in vannuoi leisiet chung munchuom chuom akuon in mihiem asang’a sim in Angeles chung’ah lunglhai louna thuphuon anei tauvin ahi. Keiho gam’ah nisa ahad val in, themkhat olsah in, nisahu zeh in kanatlo uve, adap behseh in nisa themkhat hin satbe sah in.... chule adang dang’a Angeles ki enghouna ana um’e. Hinla nisa neinu hin nisa vah akuon’a fee donding kal ngahlel in akisa buoi cheng’e.