The First Word - LD December, 2010

Pathien mapuina jal lieu lieu in khatvei toh Christmas mangkit idng ihi tauve. Hiche nasim’a hi Christmas alhun loulai leh kigel in, Christmas mulou’a zong muolliem jieng thei ihiuve ka laijon. Mihiem hinkhuo hi dolna chung’a tuivei tobang bepseu ahiye. Huimud’a khelha jieng thei hinkhuo dengdel tah i-nei’uh ahiye.
Tahsa dam ding ngaicha’a hospital’a kizen zing pasal khat chu doctor ho’n ahinkhuo abeiding ahedoh thei tauve. Seipieh ding chu hahsa asalheh uvin, hinla innsung mite aseipiehna’u damloupa’n ana kizahdoh khah’e. Hiche pedtah chun alungthim’ah ahinkhuo chiesa ho ahung kilang masapen in ahi. Innsung mite deilou lam jiengseh’a hinkhuo anaman chu akisih lheh jieng’e. Hinla ama’a ding’a phad kiti chu ana umlou ahi maita’n ahi. Alunggil in taona amang in, ngaidam achanna ding in Pathien abel’e. Chule ama zenle’a pang’a avel’a tou innsung miho suomai avet chun, amel uva lungsietna amu’n, ahomtho thei lheh jieng’e. Hiche jieng’a zong chun ama’a ding in phad bei kuoncha ana hikittai. A hinkhuo muolliem ding ahitah zeh chun innsung mite toh kihomtho tah in damlou jalkhun chung’a alupna achun hinkhuo amang tauve.
Ka Laijon, ngaituo in, tukum Christmas i-mandi’u hi nang le keiya ding’a Christmas nunungpen zong hithei ahiye. Itih’a i-hinkhuo’u abeiding aseithei mihiem koimacha aumpoi. Chamna lengpa pien kipana nikhuo mukit mong ing’e tingam ding zong i-umpouve. Eiho’a ding’a Christmas chaina pen hiding hitaleh, iki guonna’u leh i-man ding dan chung uva hin i-lunglhai mong nadiuvem? christ lawm hilou’a mass lawm ihi khahdi’u tijad aum lheh jieng’e.
Christmas zou’a i-hinkhuo’u beiding hitaleh kumdang’a i-mandan’u toh kibang ding in tahsan aumpoi. Chuomzep teiyinte. Natilou ham? Ei huhhingpu’u lunglhaina lam doltah’a i-man teidi’u tahsan lel aumpoi. Pathien lungdei bangtah’a i-mandi’u tahsan aum’e. Lenkhom le saneh bouseh athupi pen’a i-geldi’u zong tahsan aum puon, sangkhol le toka thah zong athupi pen in kigel tapuonte. Jesu Christa lunglhaina chu athupi pen hijieng ding ahiye.
I-hinkhuo’u phaimei tobang hi itih chanpi pah zing ding’a i-gel uvem? Ka Laijon, ei huhhingpu’u kipana le ama lungdei lamtah’a mang ihi theina ding uvin tukum’a Christmas i-mandi’u hi anunung pen Christmas mang dan in kigel’u hite. Chutile Pathien lunglhaina i-chot khah teidi’u tahsan aum’e. The First Word sim zouse LD min in Christmas Chibai.