Lalpu le Hoinu chapa Mangboi hi aneo apat news le magazine sim thanuom mi anahi’e. Nikhat employment news asim leh Army officer kilading ahi ti asimdoh in ahi. Koi hileh Class XII chaiho’n apply thei ahi akiti. Anu le pa’n apply tang’em, tulaiya service lah’a ahoi loi hita hime, alo lah kitub, ima zouse’a beneficiary hoiya khume athipieh lhon’e. Mangboi in anu le pa seibang in a apply in, exam agabawl in, ahung lolhing in, aban in interview achiekit in, hiche changeiya alolhin phad chun Indian Army ding in namdet in aumta’n ahi. Kumthum sung vingveng training IMA Dehradhun’ah alah’n, hahsatna le gentheina tamtah atuo zou in lolhing tah in ahin chaita’n ahi.
Innsung nuomtah akuon’a hung khanglien, guollhan laiya officer hung hi ahizeh chun Mangboi a ding in sum le pai lam’a lungdonna chu aumlou ahijieng’e. Training achaiyin Jammu and Kashmir lam’ah asoldoh uvin ahi. Suty amutieng leh inn juon pai lou in Delhi ah akibangpaji’n, hotel’ah agiehji’n, numei kijuoh holah’ah hinkhuo amangji’n, ama’n vang nuom asalheh jieng’e. Guollhang tahsa lhingsel le melhoitah ahizeh in achiena chan’ah nungahho’n angolpi hiel hiel jieng jiuve.
Nungah athah thah, avom akaang toh hinkhuo amankhom vang in Mangboi lunglai’ah High School akai laiya ana kilungsietpi a senguolngai Kimbawi milni aum thei diehpoi. Phad tin in agel zing in, hinla Kimbawi toh nuom’a laituol lenkitna ding agamla lheh jieng’e. Kimbawi chu innsung hahsa’a hung kuondoh ahizeh in Mangboi nu le pa lungsietna ana changkha tapoi. Chapang kilungsiet teni suhkhen ahitheina ding in Mangboi in matric ahin chai chaiyin Darjeeling lam’ah thiemzilna ana bawl pieh lhon tai. Hiche akuon chun tuni changeiyin akinungmu kit lhon hih laiye.
Alangkhat’ah Mangboi le Kimbawi kilungsiet zeh’a Mangboi soldoh’a aumna chu Kimbawi ading’a aguol phatah Chongpi in anahe’n, Kimbawi aseipieh tai. Khoh asa’n, hinla Kimbawi in bawlthei imacha aneipoi. Innsung hahsa ahi akihed in, nei le gou lam’a aki suonlel bep hilou in chapang ahi nahlai zeh in zong imacha aseidoh ngampoi. Ahijieng vang in a sen guolngai Mangboi amilthei diehpuon, tahsa kieh hiel in a puul anadou’e.
Darjeeling mun’a Kimbawi haimil ding’a soldoh’a um Mangboi chun Kimbawi ahaimil zou dieh poi. Hinla phad ahung chie dungjuiyin aumna mun’a um Nepali nungah melhoi tahtah hozeh chun Kimbawi puuldou chu abailam zep toh abang’e. Phad ahung chiebe kit in ahileh Mangboi in Nepali nungah kilungsietpi ahin neidoh kittai. Nepali nungah dang toh akilungsiet jieng vang in ahung poddoh kuon’a Kimbawi in a limlah apieh chu Mangboi in alunghel kuom leh aladohji’n, aveji’n, pienna gam thinglhang gam’a Kuki chanu nungah melhoi Kimbawi limlah chu vetchim nikhuo anei dieh jipoi.
Nepali nungahnu chu mihiem mitvet ding in ahoilheh jieng’e. Tucha le chempong choina khahlou beh khut zung ho zong ahoiyin, avousuo zong anem jinjen jieng in, thinglhang gam’a innsung hahsatah akuon’a hung khanglien Kimbawi toh teding chun van akuon’a vantil hung pullha toh abang jieng’e. Hinla akhoh khat chu Darjeeling mun’a Nepali nungah kichenpi zouse’n Darjeeling mun adalhah theilou zeh uvin Mangboi alung sa-ih lheh jieng’e. Eiho nungahho bang’a ajipa chenna munmun’a chengdoh nuom hilou, a gam ngailu Nepali nungah hochun agam’uh adalhah nuomlou’uh ahiye. Chapa changkhat ahizeh in ama Darjeeling’ah chengden taleh anu le pa kon avet ding hitam ti alung in agelzeh chun hahsa asa’n, a dongmanu kikhenpi jieng ding chula, amelhoina le aphatna ho zeh in hahsa asa’n...!! Hiche dinmun changeiya zong chun Kimbawi alungsietna abeithei dieh hih laiye. Senguol ngai toh kikhen sang’a najoding adang imacha aumpoi’o...!!
Kimbawi in innsung genthei le hahsa ahizeh’a Mangboi nu le pa’n achapa’u toh akilungsiet ding ana phatsah piehlou chu apona lheh jieng’e. Nikhuo khat leh a neilel zeh’a avetda le athedbawlte’n akom’a achapa’u lungsiet ding’a ahung jol theina ding uva mikhat suodoh tei ding ngaituo’n panlah ding ageltai. Hinla a innsung’a imacha umlou ahizeh in ahahsa lheh jieng’e. Tupna aum leh alampi aum’e kitima bang in tupguhna nei tinten ahizeh chun midang hedsah lou hiel in Delhi ana juonsuh tai. Hiche mun’a chun tohthei thei atong in, sun le college akaiyin, ama le ama akichomta’n ahi. Khosung miho’n vang Kimbawi hoiya chiedoh ahizong hedphah in anei dieh pouve.
Phad ana chie chie’n, Mangboi suty phad ahung lhung kitta’n, innlam juon pailou in Delhi’ah ahung kihuilhapa’n ahi. Hotel Manager pa’n jaan khat’a ` 10,000 napieh ngapchad leh nungah thah thah tamtah aum’e ti’a chilphuon kaihiel’a advertise abawl leh akhoilhahna haimil theilou guollhang Mangboi chu angolpai ding kisa’n, akhohpoi, Korea nungah khat neihin kou pieh in atitai. Manager pa’n phone abawl in, Jammu & Kashmir akuon’a guollhang hung pahi tujaan hung lunglhaisah in ati’n, phone akoitai.
Mangboi in kipahtah in a room sung’ah ana ngah in, umchim thoina’n whiskey peg 2 ana thollud man in ahi. Chomkhat zou in kot ahung kikiu in, aga hondoh leh Korea nungah khat ana ding in, English pao in ahin houpi’n, Chu-chu kahi ahungti’e. Nungahnu chu Mangboi in a sen guolngai Kimbawi toh kilou asalheh jieng’e. Hizeh chun alungthim sung’ah Kimbawi ageldoh in, nungahnu chu Kimbawi bang in agel in, nuom satah in alupkhompi tai. Jaan in nungahnu chu ahung thoudoh in, bath room lam ajuon’e. Akham zep zong hintin, akithollhu’n, vo henu... ti’n ahung pengdoh’e. Mangboi in what’s wrong? atileh Chu-chu in kaki tholzeh’a chu Korea pao’a I’m scared kahin tidoh khah ahiye ti’n adawnbut’e. Hiche phad chun Mangboi in alawinu chu Korea nungah hilou in asen guolngai Kimbawi ahi ahin hedohtai. Kiseidoh ding chula ama zong aki jongmat zeh chun thiemmo akichan in, azah acha’n, seidoh lou ding chula itih’a akinungmu kit lhon ding ahe tapuon, chule Kimbawi in ipi agel’a hiti’a numei kijuoh hinkhuo aman jieng hintem ti zong ahednuom zeh chun alung agelgel jieng ta’n ahi. Hiche kahlah chun Kimbawi chu ihmu pai ding in ana kilhimtai. Mangboi in kiseidoh ing kating, ahinkhuo thusim hedbe ingtin, chutieng kipui tang’e ti’n ageltai. Kimbawi ihmulhu ahilou lai zeh chun Mangboi in Kimbawi ti’a akou leh hoi’o... ti’n ahin dawnbut’e. Akisel guot nahnah vang chun numei lunglhom ahizeh chun akisel thei dieh tapoi.
Kimbawi in zong nilhah bultil’a kot ahon’a, Mangboi pindan sung ahung sunglhah akuon chun Mangboi toh kilou asa’n, kum tamtah kimutuo talou ahilhon zeh chun amel lhon zong ana kihaimil man lhon in, hinla sen guolngai suomai vang chu alang zing nalaiye. Mangboi ding chun agelthei puon, hotel manager pa’n Jammu and Kashmir akuon’a hung guollhang atikit zeh chun Kimbawi chu alungdong lheh jieng’e. Hinla J&K akuon’a hung Kuki chapa chun kol mel aputlou zeh chun Kimbawi chu akingaituo sah lheh jieng’e.
Ahung kiheddoh tuo lhon phad chun senlai thimthu ho ahung langdoh kittai. Kisen ngailudna luonlhi chun jalkhun chung achub in, kipaje le lhasiet je zong umtheilou hiel in jaan khovah in atoulhon ta’n ahi. Koiding in zong thilnuom vang hisam puonte ong?
Mangboi a sen guolngai angong koiyin, innlam’a chie’a kichenpi ding in ajoltai. Hinla Kimbawi in tu’a hitobang hinkhuo kaman nung’a iti nangtoh kakichen ding ham? Tuhin mi nuoinung, mi zouse thednu chu kahitai. Nang toh kicheng thei puong’e. Hinla nang vang kahin lungsiet lheh jieng’e, kalungsiet najal in katahsa chule kalungthim ngaituona zong ka idchapoi, kahin lungsiet lheh jieng’e. Hinla kicheng thei ding ihi tapoi ti’n adawnbut’e. Indian Army a Captain dinmun lhungthei guollhang miching chun Kimbawi thusei akuon chun ahinkhuo thusim ahedoh suoh kei jieng’e. Amazeh’a hiche dinmun changei ana lhung ahida’n ahedoh in, apona lheh jieng’e. Kimbawi, keizeh’a hichan’a genthei nathuoh ahilam kana heddoh lou ahi, lungsiet tah in nei ngaidam in. Hinla phad aum nalaiye, innlam’a chie hitin, ka inn-neipi in pangta’n, ti’n avel in ajolkit’e. Hinla Kimbawi anuom dieh tapoi. Khuo ahung vahdoh toh kilhon in a phone number adalha’n, Kimbawi apoddoh tai.
Mangboi ading in lunggel nopna aum tapoi. Aginchad phah loubehna mun’a a sen guolngai aga kimudoh chu kidang zong asa’n, chule thiemmo zong akichan lheh jieng’e. Hizeh chun innlam’a chie talou in khopi sung’ah aumden jota’n ahi. A lunggel kicholduona ding in ju adawnji’n, hinla kipana amudieh poi.
Nikhat jukham pum in lampi’ah achie’n, ahedlou kah chun taxi khat in ahin phukhata’n ahi. Aped ped in police ho’n adellud uvin, avet’u leh akhut’ah mobile phone ana kichoiye. A phone chu avet’u leh sms kithotdoh lou lai khat aum in, hiche’a chun hiti’n akisun’e: Kimbawi, nang’a kahi, kahinkhuo nang’a ahi. Kahinna nang nahi. A sakhao lah avet’u leh Indian Army Identity Card khat amu uvin, Captain Mangboi Kuki ti’n akisun’e. Police ho’n sms kithotna ding mobile number chu a houpi’u leh Kimbawi in ahin la’n, Mangboi kisuhkhah thu aseipieh tauve.
Mangboi kisuhkhah thu azahdoh phad chun aumthim thei tapoi. Kintah in hospital lam adel zel jieng’e. Hiche mun’a chun police ho’n Mangboi kisuhkhah dan aseipieh tauve. Jukham pum’a Kimbawi sms athot guot nalam’a chu taxi in asuhkhah ahi’n, kintah’a hospital ana lhut’uh ahida’n zong aseipieh uve. Lungthim’a puohgih tah puo in Mangboi jalkhun pang’a chun atoutai.
Mangboi in khuo ahin heddoh phad chun avet leh akom’ah alungsiet pen Kimbawi anatou amu’n, kidang zong asa ngapsah’e. A lungsiet pen in agenthei thuohna ho ahedthiem pieh ding kinepna lientha neipum in mailhai sieu in ahin houpi’n Kimbawi.... atileh Heu Mangboi, kichol in, nadalha tapuong’e... ati’n abieng’a luonlhi luonglha ho akithieh in, akiheimang’e.
Alangkhat’ah Mangboi nu le pate chun achapa’u ahung lhun ding phad’a ahung lhun tahlou zeh chun ana lungdon man tauve. Nikhuo phabep achieta’n, khatvei beh zong phone jiengcha zong ahin bawllou zeh chun alungdong theilheh jieng uve. Phone bawlding lah Delhi a hung kibangpa aguollhangpa’u chun J&K number achoi tahlou zeh chun akihoupi thei tapouvin, totun tongah umtheilou in achapa’u hunglhun ding agaldot jieng tauve.
Nithum zou in Mangboi ahung haldoh zepta’n, atha zong ahung haddoh kittai. Sen guolngai lungsietna beithei diehlou ahizeh chun avel in Kimbawi kom’ah alungsietna thimthu athahbeh in ahin seidoh kittai. Kanu le kapa thiemmona zouse ngaidam in lang, neihin zuita’n, kahinkhuo abeiding naphal lou leh neizui jieng in ti’n Indian Army Captain pa chu Kimbawi kom’ah naosen kaa in akap lhatai. Kimbawi in akichenpi lou leh thilo tahbeh ding ahi ti aheddoh zeh chun thudoh aneitai. Ahileh He’u Mangboi, nei ngaidam zou ding hinam? Anjo leh nahung kisih tieng leh ka hinkhuo mandan le iki mutuona munho zouse kei houna’n einei kha le chun keiding’a thina hiding ahi’n, kahinkhuo chiesa zouse na haimil zou nadem? ti’n adong’e. Itih chan hizong leh alungsietna chullou ding ahidan Mangboi in aseipieh tai. Chulthei ding, muolthei ding leh milthei ding’a kana lungsiet hile chun tuni chan’a kei hiti’a kaum ding ham? Ven, chung’a ahsi holeh chollhanu aso’a, kahaina hu aum laise’n nang na khen puong’e ti’n akitiem’e. Kimbawi in ka lungsietna meibuol bang le liim bang’a kitolmang thei ahilou zeh’a hichangeiya hinkhuo kana manlo ahitai ti’n ahin dawnbut’e. Hiti chun kumkhuo’a kikhen kit talou ding in Delhi mun’a KWS lamkai ho khut’ah kichenna ahin neilhon in, kipahtah in pienna gam ahin juon lhon tai.
